IL PERSONAÇ STORIC. Bortul di Panigai

Bortul di PANIGAI, (Panigai di Pravisdomini 1720 – Cividât 1793). Om di grant profîl culturâl, si è fat cognossi in particolâr pai siei studis intal cjamp de matematiche, de gjeografie, de astronomie e ancje de filosofie. Dopo vê studiât intal coleç dai Jesuitis a Belum, si trasferì a Padue, dulà che al jentrà intal ordin e al deventà docent di retoriche inte Universitât. La sô famee però e je peade a une richieste impuartante pe division gjeopolitiche dal mont di chei timps. Cuant che al veve dome 28 agns, segnalât propit dal ordin dai Jesuitis, al fo inviât dal re dal Portugal in Brasîl par dissegnâ cun grande precision i confins cu lis coloniis spagnolis de Americhe, in maniere di tornâ a viodi chel antîc tratât clamât da Las Tordesillas (1494), che pe sô imprecision al veve fat nassi tancj conflits e tantis vueris. Dute la grande documentazion metude insiemi dal Panigai si le cjate intes cjartis dal Archivi di Stât di Udin, là che son conservâts ancje i siei manuscrits di astronomie.
✒ Agnul Floramo