«Poesiis e liendis» di Renzo Balzan | “Cjargne” di Renzo Balzan

«Poesiis e liendis» di Renzo Balzan
La sô produzion e conte plui o mancul vincj libris, tra chei editâts. Dant un voli ae sô opare poetiche, che dispès Renzo Balzan le à metude dongje in libris cul titul iniziâl simpri compagn: Poesiis e liendis, par daspò zontâ de Cjargne, o sot la Mariane, o daûr la crete dal Serenât, lu met in diret contat cu la nature dai lûcs che al frecuentave.
A son cetant presints i paisaçs de Cjargne, che lui al à amât une vore, tiere indulà che al à vivût par cincuante agns.
In cheste poesie che us proponìn, mantignint la grafie origjinâl, Renzo Balzan al va cirint la “viere Cjargne”. Riis profondis, bielis e atuâls, che a meretin di jessi letis e riletis.
Un mût par scomençâ a riscuvierzi chest poete, ricercjadôr, cheste vôs dal Friûl che e val ben di fâle inmò cjantâ, e a lunc. ❚ (A.S.)
______________________________
Cjargne
di Renzo Balzan
Dulà êse la tô anime
viere Cjargne?
Achì, ret la casere
o respiri cul vìnt
il nulôr dai tiei prâts di mont
e di gnots eternis e simpri resintis.
Ma jo o cîr in d’algò
la tô anime, la cîr
tra i borcs dai cuvierts di planele
tra i sotpuartis
dissegnâts dai arcs di tof
ch’a pòlsin cidins
vuaitis di secui.
Si messede ‘es liendis
il gno ricuart,
ch’al à il savôr de zoventût,
e mi piert vie ta l’ombre
dal cidinôr discret
de tô memorie antighe. ❚