Al torne Suns Europe. In rêt il sît gnûf e l’avîs pe partecipazion

A scomencin de rêt i preparatîfs de seconde edizion di Suns Europe. Ae fin di Avost al è stât screât il sît gnûf e il Friûl al torne a jessi il cûr de Europe de diversitât linguistiche e des sôs espressions plui vivarosis tai cjamps de musiche, dal audiovisîf e de leterature.
L’apontament cul festival european des arts performativis tes lenghis minoritariis al è dai 29 di Novembar ai 3 di Dicembar.
Ancje chest an la manifestazion e vûl jessi une ocasion di incuintri e di confront tra individuis, grups, lenghis, teritoris e comunitâts. Minorancis e nazionalitâts di dute la Europe che a tirin fûr la lenghe e si contin lôr e a contin il mont daûr de lôr cjaladure specifiche e cu la lôr lenghe, cun braùre e cence pôre ni prejudizis. Sunôrs, visions, peraulis, ideis, espressions di identitâts che a esistin e che a resistin, che si cognossin, si ricognossin e si fasin cognossi e ricognossi cun snait e cun sintiment.
Za di cualchi setemane alì de direzion www.sunseurope.com a son stadis metudis adun une schirie di informazions in cont di Suns Europe, tra documentazion di archivi e inzornaments in cont di ce che al sucedarà tai prossims mês. In rêt si cjate l’avîs pe presentazion des candidaturis dentri dal 1n di Otubar e il stes sît al permet ancje di notâsi e di cjariâ la domande di partecipazion e ducj i materiâi testuâi, musicâi e audiovisîfs che a coventin.
Suns Europe al darà un premi aes miôr produzions artistichis tes lenghis minoritariis.
La sezion dedicade ae musiche e cjape dentri ancje chest an une sorte di preselezion live pai artiscj de Europe alpine e mediteranie: chê tal 2015 e jere Suns Sardigna, cumò e sarà Suns Ladinia, stant che si davuelzarà in Novembar te Val di Fasse.
Suns Europe al è un festival metût adun cul jutori de ARLeF, cul coordenament de cooperative Informazione Friulana e cu la colaborazion di une schirie di sogjets e istituzions dal Friûl e dal rest de Europe. ❚
✒ Redazion