SPECIÂL – Cori cence ruedis: su la aghe

In principi a forin il lât di Barcis e la fôs dal Tiliment. Se o vessin di cirî la scune de motonautiche in Friûl, chescj a podaressin jessi i doi puescj plui impuartants. Dongje di doi personaçs clâf, che si à di ringraziâ: Flavio Beltramini, fondadôr de sezion regjonâl de federazion, e Primo Gardin, costrutôr di imbarcazions e pilote di fame internazionâl.
AGNS SESSANTE_ Se za dai prins agns Sessante, a Lignan Riviere si davuelzevin manifestazions di motonautiche di circuit (campionâts mondiâi, europeans e talians), lis aghis di Lignan Sabbiadoro a forin invezit al centri di garis di Offshore, ospitant campionâts mondiâi di circuit. Ma ancje garis di regolaritât, riservadis a imbarcazions (motoscafs) di dipuart. La citadine e à une des ufiertis miôr dal Mediterani, cun passe 5 mil puescj pes barcjis, distribuîts in siet darsenis.
TRADIZION NAONIANE_ Lu dîs il non stes. Pordenon al ven di Portus Naonis, puart sul Nunciel. E la citât e à une storie e une tradizion in fat di barcjis, fintremai dai timps dal Imperi Roman, se no prime. I flums Nunciel, Midune e Livence a costituissin une idrovie lungje scuasit 100 km. Di 27 agns in ca, il percors al da acet al event dipuartistic «Gommonata europea da Pordenone al mare». E, dentri dal campionât european di regolaritât, ancje al Rally Vignesie-Pordenon.
BARCIS METE PREFERIDE_ Lis aghis di Barcis a son chês plui dopradis de motonautiche. Sul imprin, tai agns Otante, culì si faseve un pôc di dut, parfin parecjadudisim sul lât e orientament subacuei. Si varà di spietâ il 1984 par viodi la prime gare uficiâl di specialitât, valevule par un campionât talian. Po a son rivadis ancje lis competizions europeanis. E dal 2000, il mondiâl F3. Li si son formâts ancje i nestris campions plui fuarts: pe specialitât «circuit», Luca Fornasarig (di Manzan) e Cristiano Gasparutti (di Cormons), campions e vice campions talians in diviersis classis. Te classe formule 1000 interazional, si àn di vê indiment i sucès di Roberto Del Pin di Maran, plui voltis campion internazionâl e cun posizions simpri altis in classifiche dal 2001. Dal 2008, al à ancje laureât campion talian e mondiâl il fi, David, simpri te stesse categorie.
PÔC COGNOSSÛTS_ In Friûl, po dopo, si pratichin ancje sports pôc cognossûts de aghe. Par esempli, i passionâts di Hovercraft (garis di scafs su percors cun doi tierçs di aghe e un tierç di tiere) si dan apontament sul lât di Barcis (daûr de profonditât de aghe), ma manifestazion no agonistichis si fasin ancje a Daçan e a Siest. E par ultin, curiôs ancje l’interès pal navimodelisim radiocomandât, sul lât di Buride a Cesene di Daçan.
Oscar Puntel