Sfuei Mensîl Furlan Indipendent
Archivi de Patrie

SPECIÂL – «Paveis al puest des machinis»

............

Viers la fin dai agns ‘70, a Bordan si discuteve a fuart su la pussibilitât di passâ de piste locâl di autocross e motocross in vore di cualchi an a un vêr autodrom. Si sarès tratât di un circuit permanent che te prime progjetazion dal 1979 al svantave une lungjece di 2,5 chilometris, che al varès permetût di cori a une velocitât di passe 240 km oraris, e che al varès dât acet a garis automobilistichis fintremai ae Formule 2, ma ancje aes motos e, in fin, ai cors di vuide veloce di Polizie, Esercit, Carabinîrs e Vuardie di Finance.
LA OPOSIZION_ Il progjet al à cjatât però un ostacul fuart di bande de popolazion locâl di Bordan e di Trasaghis, comuns li che si sarès metût sù il circuit, ma ancje di dute la int de Val dal Lâc, impegnade in chei agns te dure prove de ricostruzion post taramot, e preocupade pes conseguencis ambientâls e turistichis de zone che za e jere stade tant tibiade cun progjets che le vevin savoltade di plante fûr, come par esempli chel de centrâl idroeletriche de Sade (e po dopo Enel) sul Lât di Cjavaç.
Di cheste maluserie a son stâts puartevôs no dome politics e ativiscj locâi ma adiriture deputâts dal parlament talian che a àn puartât indenant interogazions parlamentârs che a àn cjatade rispueste tes declarazions di chel che al jere in chei agns il Sotsegretari di Stât pai lavôrs publics, vâl a dî il furlan Giorgio Santuz.
UNE BATAIE CHE E à PAIÂT_ Lis resons dal disasi de int a jerin claris: no volevin che i bêçs de ricostruzion a lessin in chescj progjets e a vevin pôre che, dut câs, si sarès tratât di un dafâ che nol varès puartât nissun pro, ma ben discomuts ae int dal puest.
Za tai agns precedents si jere viodût ben che il turisim riclamât di chescj aveniments al jere dal gjenar «muardi e scjampâ»: nol lassave che pôcs francs sul teritori, al jere invasîf e nol rispietave l’ambient. Cun di plui, ancje se no jerin plui i agns che si viveve di agriculture, la int dal puest che e jere za tibiade di une situazion socioeconomiche disfortunade, si cjatave – par cuestions ambientâls e gjeografichis – a podê fâ cont su pocje tiere di coltivâ e di scjarse cualitât: chê buine, su teren demaniâl, e jere stade dade in concession a forescj par coltivazion intensivis, e chê pocje che e restave e sarès disparide, inglutide propit dal circuit.  No savìn se il progjet dal autodrom bordanês al sedi saltât propit in gracie de oposizion de popolazion e dai siei rapresentants politics, o se a sedin stadis altris lis resons. Al è un fat però che cul timp cheste oposizion e à paiât, parcè che e à permetût di pontâ sul unic patrimoni che pardabon al è in stât di inviâ un circuit virtuôs, vâl a dî chel des risorsis ambientâls locâls. Salacor, il «Progjet Paveis» che al à fat cognossi Bordan e i comuns dulintor in dute Europe, nol sarès mai partît se in chê volte chest piçul comun nol ves tignût dûr tes sôs sieltis di vuardiâ la sô identitât e lis sôs risorsis reâls.
Linda Picco

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +