NO SON PERAULIS PAR VECJOS. Realtât aumentade

_ Mandi nono!
Mandi frute, ce fâstu cul telefonut in man?
_O voi a cjace di Pokemon!
Cui pochistu?
_No pochi nissun, o voi a cjace di Pokemon, besteutis di un videozûc.
Ah, un zugut! E parcè vâstu atôr cul telefonut, alore? No puedistu stâ ferme li a zuiâ?
_Eh, no! Chel chi al è un videozûc di “realtà aumentata”: realtât aumentade. Tu âs di cjatâ i personaçs atôr dulà che tu vâs.
Mi stâstu disint che atôr e son chês besteutis che e pochin? Ma sono pericolosis?
_No son pardabon ator, tu lis viodis dentri dal telefonut. La realtât aumentade e je cussì. Tu incuadris alc e tal dal schermi tu viodis la realtât cun parsore alc altri: une figure, une scrite. Ancje i Pokemon no son pardabon pe strade, ma cul telefonut tu viodis la strade cul Pokemon parsore.
E a ce mi coventie viodi robis che no son parsore di altris robis che e son?
_Par zuiâ, o par cognossi alc. Par esempli, tu puedis lâ devant de osterie di Toni e sul schermi ti ven fûr la scrite “Osterie al Marcjât”.
Cjale che Toni al à bielzà une insegne, ancje se la T e je fulminade e cumò ducj lu coionin fasintlu cori: “Un, doi, un doi!”
_Ma magari l’aplicazion no ti dîs dome il non, ma ancje la storie…
Par chel baste domandâ a Catine: chê ti dîs la storie de osterie, di Toni e di dute la so famee.
_Tu podis cjalâ un monument e viodi dutis lis fotos che àn fat chei altris in chel puest.
Ma se tu stâs cjalant bielzà il monument, parcè varessistu di cjalâ lis fotos? Cjale il monument, no?
_Tu puedis fâ ancje un gjornâl in realtât aumentade!
Ah, chei aromai e son ducj cussì: metât dai articui e je aumentade, che altre metât propite inventade!
_E àn fat ancje dai ocjâi che tu metis su par viodi ce che al è ator e in plui alc altri.
Mah! Se l’ocjalâr mi fâs dai ocjâi che mi fasin viodi robis che no son, jo o cambi ocjalâr.
Cjale, frute, che no conventin mighe tancj imprescj par fâ che robe aumentade li.
_Ma nono, e je une tecnologjie moderne, no son ducj bogns di fâle.
A mi, di piçul, mi è bastât un ristiel: lu ài pestât, mi è rivât il mani in muse e o ài viodût tantis di chês stelis che no tu sâs, ancje s’al jere misdì! ❚
✒ Bete Di Spere