SLOVENIE. Il Guvier sloven al va indevant a piedi tocs, ma la economie e sta lant ben

Il decim secont guvier de Republiche di Slovenie, vuidât di Miro Cerar, al va indevant a pierdi tocs, cundut che il prin ministri al continui a pontâ tant su la stabilitât de coalizion. Che si manten sì inalterade (ancje se no son mancjadis tensions tra i partîts aleâts), ma in mancul di doi agns de sô nomine, sucedude ai 18 di Setembar dal 2014, l’esecutîf sloven al à cambiât za siet ministris (vot se o contìn ancje la rinunzie di Gojko Koprivec ae candidature a ministri de economie, dopo che cheste e jere stade bielza uficializade).
Il prin a dimetisi al è stât Jožef Petrovi (economie), pôc dopo dal insediament dal guvier. Violeta Bulc (disvilup) e je stade nomenade comissari european e e je stade duncje sostituide daurman. A son stadis fermadis prin de ore ancje lis esperiencis di Stanka Setnikar Cankar e Klavdija Markež (istruzion), Janko Veber (difese) e, chest an, Julijana Bizjak Mlakar (culture).
L’ultin in ordin cronologjic a dimetisi al è stât, in maniere no spietade e par motîfs personâi, il ministri des financis Dušan Mramor, pedine clâf dal guvier e persone preseade intal propri setôr in ambits internazionâi academics e politics. La riviste londinese The Banker, dal grup editoriâl Financial Times, lu à nomenât ancje ministri des financis european dal 2016. Il rûl di Mramor, che al è stât za ae vuide dal stes dicasteri tra il 2002 e il 2004, al è stât decisîf pal consolidament des financis publichis slovenis e pe jessude de Slovenie de crisi cence che si sedi fat necessari l’intervent de troika e cence jutoris internazionâi. Cundut des politichis di austeritât al è rivât a fâ calâ il deficit e a fâlu tornâ disot dal soiâr Maastricht dal 3% ancje cressint la spese publiche cun intervents tant che il sbloc dai auments salariâi dai dipendents publics. Il sucès de sô politiche finanziarie, ricognossût ancje de stesse Comission Europeane che e à sierât la procedure par deficit ecessîf inviade intal 2009, al è confermât ancje dai indicadôrs economics che a van indevant a miorâ.
Daûr dai dâts dal Ufici di statistiche statâl sloven il Prodot interni sporc al è cressût intal prin trimestri dal 2016 su base anuâl dal 2,5%. Ae cressite a àn contribuît soredut lis esportazions (+5,3%). A cressi però ancje il consum interni (0,6%). Il miorament de situazion economiche slovene e je confermât ancje dal câl dal tas di disocupazion. A fin Jugn in Slovenie intal regjistri dai disocupâts a figuravin 99.795 personis. Il lôr numar al è lât jù sot dal soiâr dal cent mil pe prime volte dopo il 2010. In confront di Mai il numar dai disocupâts a Jugn al è calât dal 2,4%. Rapuartant il dât al Jugn 2015, invezit, i disocupâts a son calâts fintremai dal 9,5%. Un trend che al cjate conferme ancje intai dâts di Mai cuant che il tas di disocupazion rispiet di Avrîl e al stes periodi dal 2015 al è stât penç: 3% su base mensîl e 9% su base anuâl.
A son otimistichis ancje lis previsions de Bancje di Slovenie pal futûr de economie dal Stât. Par la Bancje Centrâl, di fat, la cressite economiche e rivarà chest an al 1,9%, e intal 2017, ancje in graciis de circostance favorevule a nivel globâl, al larà sù al 2,5%, intal 2018 al 2,6%. A varessin di miorâ di consecuence ancjemò di plui ancje lis cundizions intal marcjât dal lavôr. Daûr dai analiscj de Bancje di Slovenie il tas di disocupazion al larà jù intal 2018 al 7,4% (intal 2013 al jere parsore il 10%). Dal an che al ven al tornarà ancje la inflazion che e sarà su par ju dal 1,5%.
Cundut dai bogns risultâts otignûts fin cumò, la Slovenie però al varà di continuâ su la strade des riformis struturâls e il gnûf ministri des financis al varà di frontâ sfidis impuartantis. Pal moment la vuide dal dicasteri e je stade rimetude a Alenka Smerkolj, ministri pal disvilup economic e pe coesion europeane. Il prin ministri Cerar, dopo lis dimissions di Mramor, al à anunziât che il gnûf ministri al vignarà nomenât a fin Avost o a Setembar. ❚
Tjaša Gruden