Cjaminâ, par no deventâ popul di “cence gjeografie”

Il 2016 al è stât clamât an talian dai cjamins de bande dal Ministeri dai Bens culturâi, par promovi cheste maniere di vivi il teritori. Fevelâ di itineraris a pît al puarte daurman cul cjâf a Sant Jacum di Galizie sul plui innomenât Camino di Europe o a Rome su la Via Francigena o a Jerusalem, dilunc di chei che a son clamâts peregrinationes maiores. Ma cence fâ tancj km par rivâ al pont di partence di chês esperiencis, a esistin ancje pussibilitâts minores o adiriture cjamins dongje cjase, trois che a corin pal Friûl e che a puedin dâ la ocasion di vivi la esperience dal pelegrinaç, sedi par cui che al crôt sedi par cui che nol crôt.
Fra i plui biei trois di chenti, chel che o ai fat jo al è il Cammino Celeste (www.camminoceleste.eu) che chest an al fâs dîs agns di cuant che tal 2006 un grup di personis che a vevin fate la esperience sul Camino de Santiago a àn volût inventâsi chest itinerari che al lee trê santuaris marians furlans (Barbane, Madone di Mont e Mont Sante dal Lussari, partint di Aquilee, glesie mari dal Friûl); o il Cammino delle Pievi (www.camminodellepievi.it), itinerari circolâr che al tocje lis plêfs de Cjargne; o la vie dal Tiliment di pas di Mont di Crôs dilunc de “aghe” furlane par antonomasie (www.hospitalesangiovanni.wordpress.com); o la Romea Strata (www.romeastrata.it) che passant pal Friûl e puarte a un colegament cu la via Francigena. Cuatri esemplis inte nestre tiere che a puedin fânus scuvierzi, o miôr “tornâ a scuvierzi” che lis viis dai piligrins a son patrimoni de nestre storie, de nestre identitât e dal nestri vuê.
La Regjon, midiant dal vicepresident Sergio Bolzonello, e fevele di deventâ pont di riferiment des politichis ministeriâi su cheste teme, considerât strategjic pe promozion turistiche regjonâl. Ma l’auguri che mi fâs al è che prime di resonâ in tiermins turistics economics, la riscuvierte dal lâ a pît e sedi ancje la riscuvierte dal teritori che al è ancje nestre culture. Cualchidun al diseve che i Furlans a son un popul di “cence storie”… no volarìno cori il pericul di deventâ popul di “cence gjeografie”?

No nus reste che augurâsi: «buen camino», magari Sul Troi di Aquilee o un di chei altris itineraris furlans. E che, finît di lei chestis riis, o vierzedin la puarte di cjase e cuntun bon pâr di scarpis o ledin fûr di cjase a tornâ a scuvierzi la nestre tiere… a pît. ❚
✒ Christian Romanini
Romanini al è autôr dal libri Sul Troi di Aquilee. Al è un diari di viaç che l’autôr al dediche a so fi Lorenzo, descrivint la sô esperience sui prins 70 km dal Cammino Celeste. Sul Troi di Aquilee, Edizions Glesie Furlane (www.glesiefurlane.org) 1e edizion: Dicembar dal 2015; 2e edizion: Avrîl dal 2016. Par altris info o comprâ il libri, o podês domandâ te vuestre librarie di fiducie o scrivi a info@glesiefurlane.org.