3 DI AVRÎL. La storie de Fieste nazionâl e ven de rinassite culturâl daspò dal taramot

L’inovâl dal Friûl pai 3 di Avrîl cumò al è celebrât simpri di plui, e simpri di plui si sa di dulà che al ven: de nassite dal Stât Patriarcjâl, ai 3 di Avrîl dal 1077.
Ma cuant e cui aial “decidût” che cheste date – jenfri lis tantis – e fos chê buine par jessi la Fieste nazionâl furlane? Si dîs che al è stât pre Checo Placerean, il grant predi furlanist, ma nol è propit cussì. O vin sintude la version dal professôr Zorç Ius, inteletuâl furlanist espert di storie e za tal diretîf dal Moviment Friûl, che nus conte di vê vude lui la idee: «Il spont mi è vignût di un libri scrit di Arduino Cremonesi publicât intal 1972, dal titul L’eredità europea del Patriarcato di Aquileia. Un libri che o vevin presentât vie par une cunvigne de Clape culturâl Ermes di Colorêt di Tresesin, intal 1974» al dîs. «Di chest libri mi à stiçât massime la introduzion, li che Cremonesi al diseve che il popul furlan nol à memorie de sô storie parcè che par visâle a coventin datis, ponts di riferiment, tant che un inovâl.»
Chê dal inizi dal Patriarcjât a ius i somee une date ideâl: par valence storiche, par vie dal “3” «un numar che al reste tal cjâf subit» e ancje pe colocazion stagjonâl «sul tacâ de Vierte». «Une date scrite in ducj i libris, e che si ricuardave za» ma il professôr le propon propit chê come une ipotetiche Fieste Nazionâl dal Friûl. Cheste discussion e va indevant ancje dentri dal diretîf dal Moviment Friûl, li che al jere pre Checo Placerean, che le sburte cun fuarce midiant de sô grande abilitât comunicative.
Lu fasè ancje tal so famôs discors tignût a Aquilee ai 11 di Lui dal 1976, li che al fevele dal inovâl cussì: «Cun ducj i nestris difiets, nô predis o vin simpri cirût di fevelâ pal nestri popul, par chel popul che a ‘nt fevelarìn ancje l’an che al ven, che a saran i 900 agns di cuant che Indrì IV al à fat duche il Patriarcje di Aquilee. 900 agns de indipendence dal Friûl no podìn lassâju passâ cuiets!»*.
E cussì la prime vere ocasion li che la date e ven “sperimentade” e je ai 3 di Avrîl 1977, e a 900 agns precîs dal inizi dal Patriarcjât. Al jere un periodi di ferment dât dal post taramot, un moment di resurezion culturâl dal popul furlan, forsit ancjemò prime di chê economiche che si realizarà tai agns. In chê ocasion si rivà a meti adun cetante int, cun tante partecipazion, par un event che cumò si clamarès une grande manifestazion nazionâl. Tancj partecipants za in chê volte a jerin cu lis bandieris, chês bandieris cu la acuile che pôcs a cognossevin, ma che cumò, pai 3 di Avrîl e no dome, si viodin svintulâ ator pal Friûl simpri di plui.
*Note: l’audio di chel famôs discors si cjatilu on line digjitant Predicje di pre Checo Placerean a Aquilee su Google o su Youtube. ❚