Sfuei Mensîl Furlan Indipendent
Archivi de Patrie

EDITORIÂL – Ce i covential vuê al Friûl?

............


Vie pal 2013 mi è capitât di dâ une man a une serie di trasmissions di Onde Furlane dal titul Nazion in Moviment. Si deve une cjalade al teritori, ae economie, al sociâl, aes istituzions. Si voleve capî se a jerin ideis e fuarcis par sostignî un pont di viste furlan su lis cuistions decisivis pal nestri futûr. Di chi la idee di fonts: tornâ a pensâ la Nazion Friûl dai nestris siums, par vie che lis robis a son cambiadis cetant dai agns ’70.
_In chê volte, tancj di nô a àn scuviert la “nazion improibide”, e e je vignude sù la volontât di fâi paiâ al stât talian ce che la sô storie nus veve dineât, in tiermins di lenghe, di istituzions, di disvilup sociâl e economic; chest par fânus deventâ la avanvuardie di politichis internazionâls di concuiste e di difese. O vin otignût alc ma no dal sigûr dut.
_Vuê o sin di gnûf a un svolt decisîf: l’orizont dai stâts nazion si è sierât. E il stât talian nol è plui il sovran democratic che al pues ricognossi i nestris dirits, ma al è daûr a deventâ un pugjil sunât che al da jù patafs di ca e di là sperant di tignîsi impins. E cussì, une dì nus puarte vie un miliart di euros di jentradis publichis e un altri al vûl fâ sparî la nestre autonomie speciâl e fânus deventâ venits.
_Par batilu no si à di fâ come lui, ma si à di restâ lucits e colpî cun decision ma cun razionalitât. Ce i covential vuê al Friûl? Prin di dut un gnûf rapuart tra comunitât e citadins cu la politiche. Une intese politiche tant che lûc di confront tra ideis e progjets, no di concuiste di posizions di podê dulà che magari al vinç cui che al berle di plui. O scugnìn duncje scjampâ dal sisteme politic talian. No par sierâsi intun ghet ma par capî miôr la Europe e il mont.
_E covente dopo une idee di unitât teritoriâl dulà che lis diversitâts e i bens comuns che chestis a produsin – lenghis, culturis, economiis di teritori, solidarietât di comunitât – a sedin al centri dai pinsîrs di cui che al aministre. E e covente duncje une struture istituzionâl regjonâl e locâl che e supuarti chest cence prevaricazions.
_I convuls dal stât talian a son daûr a puartâ a une riforme costituzionâl autoritarie e centralizadore che probabilmentri no pues fâ altri che agravâ la sô crisi. Al Friûl e ae nazion linguistiche furlane ur tocje vuê il compit di savê vuidâ il contrast a chest procès e chel di rilançâ in maniere decise la nestre specialitât, ancje se precarie. _O vin di definî e di pretindi lis competencis che nus coventin.
E i citadins a àn di capî che la lôr cualitât di vite future e dipendarà dal gjestî miôr lis nestris risorsis e dal vê in man struments adeguâts di autoguvier. Dut chest nissun no nus al regalarà. Par chest rivoltâsi al è just. ❚
✒ Giorgio Cavallo

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +