Cjargne greeters”: no vuidis turistichis, ma ambassadôrs di emozions

“No je une robe origjinâl nestre, parcè che i greeters a son nassûts in gracie di une femine di New York: e viodeve a rivâ cetante int te sô citât e i someave che la stesse citât no des il messaç just ae int che e rivave alì. E cussì jê e à tacât a compagnâ i turiscj spiegantjur cemût che e viodeve cui siei voi New York. Cheste idee si è pandude in diviersis parts dal mont. E je une rêt a nivel internazionâl. In Italie e je presinte di pôc, juste in cualchi citât (Napoli e Turin). In dut l’arc alpin no esist: par une volte, o sin i prins in chest! “In Cjargne – e conte Candida Nigris, presidente de associazion – il progjet al à cjapât vite midiant de Cooperative Cramârs che e je rivade adore di realizâ la idee di Euroleader. La Cooperative Cramârs e à vût contribûts par svilupâ il turisim e in cheste maniere e à podût inviâ il progjet. Il greeter nol è une vuide turistiche. E je une persone che e vûl dâ a di chei che a rivin inte sô tiere emozions diferentis.
Al moment, i greeters cjargnei a son 24, ducj volontaris, e a son personis pardabon incredibilis e inamoradis de proprie tiere. No àn nissune competence a nivel turistic. Il greeter ti cjape par man e ti puarte ator a viodi cui siei vôi, cu lis sôs emozions la sô tiere che i vûl un ben da la anime.”
Cui che al vûl sielzi il propri greeter al baste che al ledi tal sît www.carniagreeters.it indulà che al podarà ancje capî lis bielis robis che al podarà viodi e fâ in Cjargne.
E alore si podarà lâ te cjase dal 1700 “da Duga” a Salârs, piçule borgade dal Comun di Ravasclêt/Monai indulà che Ulderica e à fermât su pe pelicule fotografiche la storie, la int e i lûcs de Cjargne; cognossi Paolo che al puartarà a scuvierzi la val dal Dean; Sara che e podarà vierzi un barcon su Paulâr e la storie dai guriuts… E se une dì al plûf, Nives, par Rualp e Val, e podarà insegnâ a fâ i vecjos mangjâs di une volte.
Chest al è dome l’inizi. “A son inmò tancj progjets di svilupâ – e va indenant Candida – o speri par intant che chest al puedi puartâ un bon contat tra il public e il privât. Mi auguri che la associazion e rivi a unî dut ce che cumò al è discolegât e o speri che Cjargne greeters e cjapi simpri plui pît e soredut che e vebi une grande funzion.”
Cuant che lis robis si fasin cun passion, dut al cambie e dut al cjape une plee diferente: cui che al decidarà di cognossi la Cjargne in cheste maniere, dal sigûr autentiche e gjenuine, al puartarà a cjase une esperience uniche. ❚ ✒ M.V.