Lenghe di lavôr, ancje pai students forescj

L’interès pe lenghe furlane si à tra i zovins natîfs di chenti, ma ancje tra chei che a divegnin – lôr o la lôr famee – dal forest. Chestis personis tes rispuestis che a àn dât al scandai fat al IAL a dimostrin un rapuart interessant cu la lenghe, ni di pôre ni di inferioritât a savêle. Che anzit, a spessein a dî che le zontaran ae lôr marilenghe tes ativitât di un doman. Di fat, plui di cualchidun di lôr al à dit che al metarà il furlan dongje de sô lenghe di divignince, par esempli tes tabelis de buteghe, par atirâ i furlans di nassite e ancje lis lôr comunitâts che a vivin tal teritori.
Intant alì dal IAL il rapuart cu la lenghe furlane si fâs simpri plui fuart e articolât. Cun di fat, juste in chestis setemanis e je stade completade la segnaletiche dentri e difûr dal stabil inte forme bilengâl talian/furlan: des aulis ai laboratoris, dai coridôrs ai curtîi, de segretarie ae cusine. Te aree dal acet al vignarà metût un totem cu la scrite “Benvignûts al IAL, la scuele dal savê fâ. Un lûc di formazion, inlidrisât tal teritori, proietât tal avignî”. ❚ ✒ A.L.