IAL: la prime scuele cul furlan curicolâr tal plan di studis

Il furlan tant che materie metude dentri ad implen tal percors dai studis di trê agns al IAL di Udin. Chest an si à scomençât cun dôs oris, ma si “larà in cressi”, al sigure il diretôr, Alessandro Cattonar, che al met in lûs la vere novitât di cheste esperience: e je la prime volte in Friûl che une scuele superiôr e met la marilenghe tant che materie di studi obligatorie e no facoltative. Cun di plui, “cheste sielte e rivuarde dutis lis classis e dut il troi formatîf, si che duncje, si à un biel trop di students che a vegnin a contat cu la lenghe”, al dîs.
Cun di fat, in cheste prime volte a son stâts plui di tresinte chei che a àn studiât il furlan a partî di un vocabolari di fonde. “La esperience e je stade positive, a son stâts contents ducj, ma soredut i zovins che a rivin dal forest, par vie che par lôr savê la lenghe di chenti e je une maniere par integrâsi ancjemò di plui”.
SIELTE DI CONCRETECE
La motivazion ae origjine di cheste sielte poiade de Arlef, la Agjenzie Regjonâl pe Lenghe Furlane, ma volude cun grande convinzion e je un grum peade ae concretece e ae pratiche dal vivi di ogni dì. Di fat, al IAL si studie par deventâ specialiscj te vendite, te promozion turistiche, cogos, camarîrs, piruchîrs, estetistis. “Ducj lavôrs che pe plui part si spere di rivâ a fâ tal marcjât di chenti, dulà che savê il furlan, sei in citât e ancjemò di plui tai paîs, al è impuartanton”, al sotlinee il diretôr. “Lu àn capît ancje i students fasint i periodis di prove: tocje almancul savê scambiâ cualchi peraule cun chei che a passin la puarte par vê un servizi, e tocje savê il non dai imprescj par furlan”.
Insumiis, furlan tant che element di fonde par incressi la pussibilitât di lavorâ miôr chenti e ancje par vê da fâ miôr cu la int. Un impegn chest de lenghe, che pal IAL si zonte intune suaze plui grande di leam cul teritori. “O vin fat il ricetari par furlan – par esempli, al dîs il diretôr -, i nestri zovins cogos a scuegnin savê fâ lis pitancis tipichis dal teritori e a àn di savê i lôr nons par furlan”.
ACET POSITÎF
Chest sfuarç al cjate un acet plui che positîf tai students par vie che bielzà par lôr cont a son convints che la lenghe e sedi un imprest di tignî bon par inserîsi ancjemò miôr tal mont dal lavôr, come che e pant la ricercje che e je stade fate in cont di chest cantin ae fin dal percors di formazion di chest an.
Almancul a nivel di principi, la cuasi totalitât dal campion, il 93% dai students, si declare convinte che al sedi impuartant doprâ la lenghe dal teritori tant che imprest di marketing, cundut che il 21% dal campion la lenghe furlane no le feveli e nancje le capìs. Une buine part di lôr a motivin ancje cheste convinzion, riferint che zontâ la lenghe a un prodot e a un servizi al jude cetant il marketing, sedi che si indreci ai consumadôrs locâi che ai forescj.
LIS BUTEGHIS CUL NON FURLAN
Plui de metât dal campion, inmò, e je za sigure che e doprarà la lenghe te ativitât future sedi par favorî e rinfuarcî la comunicazion, sedi par diferenziâ i prodots e i servizis e par incressi lis venditis. Chel 51% che al à dit che al doprarà il furlan tal sô lavôr al à bielzà un grum di ideis in merit. Dal scandai fat de Arlef tra i zovins dal IAL, di fat, al è saltât fûr che un ciert numar al pense di clamâ la buteghe cuntun non furlan – par esempli Bielece, Tratorie de ligrie… -; di meti su la puarte i oraris e lis scritis viert/sierât, tire/sburte; di doprâ la lenghe furlane par publicitât e promozions su cjarte, in radio e in tv, prontâ manifescj, volantins e biliets di visite; fâ la liste dai servizis e dai trataments estetics o di piruchîr; picjâ cartei e ufiertis speciâls periodichis dentri de buteghe: par esempli, te aree depilazion “Strenç i dincj e tire!”.. ❚
Antonella Lanfrit