Sfuei Mensîl Furlan Indipendent
Archivi de Patrie

Minorancis che a contin: i Curdis a blochin Erdogan in Turchie. Cui che a son e cui che al è il lôr gnûf leader

............

Al inizi dal mês passât si son davueltis lis elezions in Turchie.
Recep Tayyip Erdogan al pontave a passà il 60% dai vôts par podê cambià la costituzion in mût di dâ plui podê al president, ven a stâi a se stes.
I je lade strucje soredut pal sucès dal Partît Democratic dal Popul (HDP), nassût di pôc, che al à vût il 12,9% dai vôts, superant il limit dal 10% proviodût par jentrâ in parlament.
Ae vuide di chest partît Selahattin Demirtas, un zovin leader curdi, avocat, paladin dai dirits des minorancis tant che curdis, lavoradôrs sfrutâts, feminis e omosessuâi. Ma stant ai analiscj politics, tancj vôts i son rivâts dai curdis conservadôrs che non si son plui sintûts rapresentâts dal AKP (Erdogan) che al dîs che “no esist une cuistion curde, al esist dome il terorisim”. Stant ai ideâi, l’HDP nol esclût nissun, prometint libertât a dutis lis lenghis, a dutis lis etniis e a dutis lis religjons, oltri che a lis categoriis plui debilis che si diseve prime. Il risultât otignût al è un biel “stop” par Erdogan, autôr di resint di declarazions, par esempli, cuintri de paritât om e femine.
LA SÔ STORIE
Demirtas al conte di vê capît di jessi curdi cuant che, a 15 agns, intun funerâl di un impuartant esponent politic curdi, che si pense al sei stât copât de “security force” turche, al à viodût un trop di personis no identificadis, che al à tacât a trai su la int, copant vot di lôr. “Di chel moment o ai capît ce che al vûl dî jessi curdi”. I curdis a son une minorance di plui o mancul 18 milions di personis sparniçadis fra Turchie, Iran, Iraq, Sirie, Grecie e Turchie.  E propit in Turchie, li che a son plui dal 20% de popolazion, a àn mancul tutelis tant che minorance.
Demirtas al jentre in politiche intal 2007 intal partît DTP, sierât doi agns plui tart dal guvier cu la acuse di jessi sostignidôr dal PKK (Partît dai Lavoradôrs), moviment politic clandestin armât. Dopo al jentre tal BDP (Partît de Pâs e Democrazie). Intal 2010 cuant che al è in parlament tes filis dal BDP, al ven condanât a 10 mês di preson par vê dit che si veve di dialogâ cul PKK e par vê definît in parlament il lôr leader Abdullah Öcalan “siôr”, robe che e je stade considerade une ofese. La condane no je stade scontade par vie de imunitât parlamentâr.
In tal 2011 al promôf une campagne di disubidience civîl cul obietîf di dâi vôs aes richiestis di istruzion in lenghe curde, la modifiche de leç eletorâl e la fin des operazions militârs tal sud est dal paîs. A parteciparin sindics, politics curdis e int semplice. Nancje fevelâ, la reazion des autoritâts turchis fo imediade.
Plui tart al cjape la vuide dal HDP, nassût di une cueste dal BDP.
Intal 2012 si fevele di lui parcè che al fâs di mediatôr tra il guvier e i 700 presonîrs (pe plui part politics) che a faserin il siopar de fam, durât 68 zornadis, par vê il dirit di difindisi in lenghe curde in tribunâl e, in gjenerâl, par che il curdi al podès jessi doprât tai documents publics.
Di fat e jere ancjemò in vigôr la leç dal 1928 clamade “des trê letaris” che e improibive di doprâ tai documents uficiâi  Q, X e W, propriis de lenghe curde, ma che no si cjatin tal turc.
Midiant la mediazion che si diseve fate di Demirtas, tal 2013 si è rivâts ae abolizion di cheste leç, otignint ancje di podê fevelâ il curdi in spazis publics, robe che fin in chel moment e jere considerade un dopli afront: ae Costituzion e ae “lenghe mari” (il turc). Il guvier al à ancje autorizât l’insegnament dal curdi tes scuelis privadis.
Intal Avost dal 2014 al cor pes presidenziâls, ma al rive tierç cun pôc mancul dal 10%.
Mancul di un an dopo, il risultât che o savìn. ❚
✒ R. e D.V.

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +