Sfuei Mensîl Furlan Indipendent
Archivi de Patrie

Giobatta Morassi, il mestri liutâr innomenât a nivel mondiâl che al fâs sunâ… i peçs di Tarvis

............

Fâ butulâ lis notis musicâls di un toc di len. Al è il mistîr dal liutâr, ven a stâi di cui che al costruìs struments musicâi a cuarde tant che violins o violoncei. Lavôr speciâl che al scomence intal bosc. Parcè che la materie prime, il len, al à di vê carateristichis particolârs. Un om, in Friûl, al à vût laudis mondiâls par cheste ativitât: Giobatta Morassi, classe 1934, al è un dai paris de liutarie contemporanie. Un dai plui cirûts e nomenâts. Al vîf a Cremone ma di tant in tant al va a Cjamparòs, dulà che al à cjase. Tarvis i à dade la citadinance onorarie, la Universitât dal Friûl, di pôc, la lauree honoris causa in Dissiplinis de musiche, dal spetacul e dal cine.
––
Giobatta Morassi, ancje se al è stât traplantât a Cremone – cjase di Stradivari -, al è nassût a Cedarcjis e al à vivût di zovin in Valcjanâl. Il bosc di Tarvis ise stade la sô scune?
La zoventût le ai passade a Cjamparòs e culì o si lavorave la tiere o si lavorave tal bosc. Li al è stât il prin contat cul len. Nissun al saveve ce che e jere la liutarie. A part un carabinîr dal paîs.
––
Che nus conti.
Chest om al veve doi fîs che a sunavin il violin, un al studiave a Vignesie e un a Udin. O jerin amîs. Une dì o jeri tal cjamp a semenâ cartufulis cun gno parî, il carabinîr al rivà berghelant cuintri gno pari: “Suo figlio ha talento, lo faccia studiare liuteria!”.
––
E cuant aial lassât il Friûl par lâ a Cremone?
O ai vude la fortune di vinci une borse di studi de Cjamare di Cumierç di Udin, propit in chel setôr. Chê volte no si veve la pussibilitât economiche. Se no ves vût chel jutori, no je varès fate. O ai cjapât il tren e o soi lât a Cremone. Cuant che o soi rivât o ai domandât informazions dulà che si cjatave la Scuele internazionâl di Liutarie. Mi cjalavin in stuart: “E ce ise?”. Parfin culì.
––
Tornial spes in Valcjanâl?
Simpri, ogni Istât. Mi fermi cualchi mês, ancje par scjampâ dal cjaldon de citât. Po dopo, jo o soi usât a stâ tes mês monts e tal gno bosc. Che al è chel di Tarvis, dulà che o sielç il len di peç par fâ sunâ i miei violins.
––
Ce carateristiche aial di vê il peç?
Chel di Tarvis al è speciâl. Lu ài discuviert jo, cuant che o ai scomençât a studiâlu. Il len dal violin al à di à di vê ciertis cualitâts armonichis e acustichis, par pandi il sun. Al pâr incredibil, ma il nestri peç al è il miôr di ducj. Plui tu ti movis viers nord est, viers Austrie, Gjermanie, Russie e paîs dongje, plui cheste carateristiche e va in decjadiment.
––
Cemût si spieghial?
Al è un misteri! O pensi che al sedi un miscliç di aiar, di soreli, e temperaduris. Jo lu studi ancjemò in di dì vuê. Par altri, o soi impegnât ancje tant che president de Associazion Liutarie taliane, o vin inviade une colaborazion sientifiche ancje cu la Universitât di Udin.
––
Lui al è cetant cirût ancje in Gjapon e in Asie.
Îr a son stâts a cjatâmi ancje trê cinês, un al jere un gno ex arlêf. Là vie a àn culture musicâl, a cognossin la storie de musiche e i struments. Cuant che mi clamin in Gjapon, o jentri in chescj conservatoris, tu cjatis frutins che a sunin dai 2 agns in sù. Ancje doi mil di lôr!
––
Cumò so fi e sô nevôt a stan mandant indevant la dinastie dai violins Morassi.
Lu saial che mi rive ogni dì une ordenazion?
––
Ogni dì une?
Cuant che un al devente vieli, tal nestri setôr, a aumentin lis ordenazions: cuant che il liutâr al murarà, il valôr dal violin realizât, al cressarà cetant. Cumò o colabori cun gno fi e gno nevôt, a son plui lôr impegnâts te costruzion. Ma jo ancje: no si rive a smeti. Cundut che o ai tancj impegns istituzionâls, di studis e di conferencis.
––
Un dai siei violins, trop valial sul marcjât?
Che altre dì a ‘nd àn juste vendût un dai miei, costruît tai agns Setante. Valôr: 50 mil euros. Cualchi toc in Gjapon al è rivât fintremai a 100 mil. ❚
Oscar Puntel

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +