Referendum par fâ di Friûl e Triest dôs Provinciis Autonomis sul model di Trent e Bolzan: za tantis lis adesions

A son za 400 lis adesions ae iniziative dal Comitât che al è nassût ai 30 di Mai par imbastî un referendum che al cambi muse a cheste regjon par difindi la sô specialitât: la propueste di Mario Anzil, sindic di Rivignan, e dal so coleghe di Teôr Fabrizio Mattiussi e je che di “assegnâ al Friûl e a Triest il status di Provinciis Autonomis sul model di Trent e Bolzan”. Une idee che ur plâs a une vore di furlans “tant che – al spieghe Anzil – no passe zornade cence che a rivin gnovis adesions e messaçs di int che nus sburte a lâ indevant”.
AUTONOMIE IN PERICUL
“La autonomie de Regjon no je mai stade cussì in pericul e ancje i nestris Comuns a vegnin glotûts intune riforme che nissun al capìs. Invezit la nestre iniziative e va drete incuintri a ce che si spiete la int. Autonomie che e tuteli la identitât di un teritori” al conte il sindic. Par cheste idee, che no je gnove, al è dut câs timp di madressi intun moment dulà che par rispuindi al atac ae specialitât de Regjon no bastin plui lis peraulis de politiche, ma e covente la mobilitazion dal bas. Come che i furlans a àn fat ai timps des bataiis pe Universitât e pe ricostruzion dal taramot. Ma cumò sono lis cundizions par un procès di partecipazion cussì penç?
OBIETÎFS E OSTILITÂTS
Anzil al crôt di sì: e no par ingjenuitât. Fin dal so nassi, il Comitât si è dât un obietîf clâr: rivâ a mil adesions dentri dal Istât. “Cence partecipazion popolâr, no si rive di nissune bande – e je la opinion dal promotôr – e magari tu puedis rivâ adore a cjapâ sù lis 15 mil firmis che a coventin a realizâ un referendum propositîf, ma la bataie e riscje di restâ une robe par pôcs. Invezit, tirâ dongje fin dal inizi un miâr di personis al è il metodi miôr par vê une forme di coordenament, sedi organizatîf che teritoriâl, util tal moment che si varà di tirâ sù lis  firmis e di cirî consens sui teritoris. Parcè che al Ducj pal Friûl, cuintri dut il sisteme politic e cuintri ducj i partîts: parcè che la contrarietât des formazions politichis presintis e je za stade pandude in maniere clare. “E je ostilitât biele e buine, cuinçade ogni tant ancje di cualchi menace velade. Lu vevin za metût in cont, ma al è simpri brut tocjâ cun man la distance jenfri la politiche e il mont reâl, il sintiment de int. Se o vevin bisugne di une conferme cumò lu savìn: se o spietìn i partîts, a Rome o in Regjon, non je fasarìn mai. Tocjarà fâ come che a àn simpri fat i furlans, ven a stâi di bessôi …”.
INT CHE E TORNE A CRODI
“La robe plui biele di dute cheste esperience – al continue Anzil – e je viodi tante int che si jere disamorade de politiche che e torne a crodi intune forme di partecipazion dal bas. A son i vecjos militants autonomiscj adun cui zovins che a vuelin batisi pal lôr teritori”. E no dome par une astrate forme di afiet: Anzil, che al è avocat, al viôt intes riformis che a son in aprovazion a Rome e a Triest une lesion cence precedents a aspiets fondamentâi de Costituzion come la autonomie e la sussidiarietât. “Cu lis riformis istituzionâls che a acentrin il podê di gnûf intes sôs mans, il Stât centrâl al vûl tornâ a cjolisi a nestri dam chel toc di sovranitât che al à scugnût cedi aes istituzions sorenazionâls come la Union Europeane. E se il Stât al gjave podê aes Regjons, lis Regjons dopo lu gjavin ai Comuns. In cheste maniere i citadins si cjatin cui nivei decisionâi simpri plui lontans”. Par chest un grup di aministradôrs, juriscj, imprenditôrs al à za decidût di poiâ cheste propueste. E provâ a dâsi di fâ daurman. Parcè che vuê al pues someâ masse adore par movisi, ma doman al podarès jessi masse tart. ❚
Walter Tomada