SPECIÂL – Volontariât furlan: vîf, atîf e cence polse, a servizi di cui che al à bisugne

Il volontariât al fevele par furlan e al è peât al teritori e aes sôs esigjencis. Se o cjalìn la suaze dal sociâl, dant un cuc tal sît dal Centri Servizis Volontariât regjonâl o cjatìn une vore di associazions che a àn il non furlan, o che al ricuarde alc de nestre regjon, e altris che aromai di agns si identifichin cu la voie di fâ e di judâ che si cjate a plen in ogni cjanton dal nestri Friûl.
Provìn alore a cjalâ plui di dongje chest mosaic, fat di tantis tessarutis che – zontadis une cun chê altre – a fasin un cuadri di biei colôrs, chei de solidarietât e dal jutori disinteressât viers cui che al à bisugne.
Dinsi une man (www.dinsiuneman.org), cun sede a Pagnà, e je une cooperative sociâl nassude tal 1987. E je specializade tal traspuart e tal compagnament dai disabii tai centris di cure e di riabilitazion o ancje a scuele e tal puest di vore. Cun di plui e organize viaçs turistics e a furnìs imprescj specifics pe mobilitât. La cooperative e je ative su dut il teritori de provincie di Udin e tai ultins agns e à incressût i siei servizis cun corsis personalizadis par chei che a àn bisugne di movisi e che no rivin a fâlu di bessôi par cause di un handicap.
Tal Zenâr dal 1985 e ven inviade a Udin la Cooperativa Sociale Cif & Zaf (www.cifezaf.it) cun chê di inserî sul lavôr personâl che par varis resons al fâs fadie a cjatâ un puest di vore (ex alcoliscj, detignûts in semilibertât, personis cun problematichis psichichis). Cumò a lavorin te cooperative 13 socis che a son impegnâts te manutenzion di areis verdis sedi publichis che privadis, tes puliziis, tal traslocament e tal disbratament di materiâi di discjarie.
Tai ultins agns, cu la popolazion simpri plui viele, al è une vore sintût il probleme dai malâts di Alzheimer e ancje dal sostegn ai familiârs che ju assistin. Di dut chest si ocupin la Associazione Alzheimer Udine (sede in Vie Diaz, 60 a Udin), la Associazione Alzheimer Bassa Friulana (www.associazionealzheimerbassafriulana.it), la Associazione Alzheimer Latisana, la Associazione Alzheimer Mitteleuropeo (sede a Gurize) che a informin, a cirin di rindi plui sensibile la opinion publiche, a dan assistence domiciliâr gratuite, a judin i familiârs a frontâ lis dificoltâts de assistence e a formin personâl specializât.
Di une coltivazion tipiche de plane furlane, ma soredut dal concet che la panole e je fate di tancj grignei che insieme a fasin un prodot che al garantìs la farine pe mangjative, al ven fûr il non de Associazione La Pannocchia (www.lapannocchia.org). E je une realtât une vore ative sul teritori dal Friûl di Mieç che e da sostegn aes fameis cun disabii psicofisics; volude tal 1986 di un grup di gjenitôrs preocupâts dal avignî dai lôr fîs, dentri di cheste associazion al è nassût il progjet «Una Finestra sul Futuro – Dopo di Noi» che al à puartât ae costruzion di une comunitât residenziâl di 1.200 metris cuadris cuvierts. In cheste direzion e lavore ancje la Associazione di volontariato Laluna (www.cjasalaluna.com), cun sede a Sant Zuan di Cjasarse, che e gjestìs une comunitât – la prime te provincie di Pordenon – che si clame Cjasalaluna «Paola Fabris», li che a vivin personis cun disabilitâts fisichis, fasint un grum di ativitâts educativis e ricreativis. Tancj i events organizâts de associazion; un di chescj al è Folkwest, li che a àn sunât i Flk, i Arbe Garbe cu la presince ancje dai Fantats Furlans.
Il Samaritan Onlus (www.ilsamaritan.org) di Ruvigne al jude i emargjinâts, i disabii e ducj chei che in gjenar a àn bisugne, dant servizi residenziâl e diurni, fasint ativitâts di laboratori e ricreativis. A Cjampfuarmit e opere la associazion Puarte Viarte, une sorte di centri di scolte cun ocasions di incuintri e di ativitâts par personis che a son di bessolis e che insieme a cirin di scombati la solitudin. A Gurize Judinsi e lavore par ducj chei che a son in dificoltât.
La Associazione Buteghe dal mont di Glemone e cjale al setôr de solidarietât internazionâl, promovint il cumierç just e solidari, e a Darzin ancje la Associazione Solidarmondo Pn–Aganis e sta daûr de cooperazion cun Paîs dal Sud dal Mont e cors di formazion pal volontariât viers chescj.
Di no dismenteâ pe sô ativitât ferbinte a pro des fameis cun fruts malâts, in particolâr di tumôr e di leucemie, la Associazione Luca Onlus che e da assistence ancje psicologjiche e e colabore a strent cui centris regjonâi di cure di chestis patologjiis pediatrichis (Aziende Ospedaliere di Udin e Cro di Davian). Tal sît internet www.associazioneluca.it (plen di pipins e di colôrs) si puedin viodi i progjets fats, tant che chel di Musicoterapie e de donazion di machinaris al Ospedâl di Udin.
Un volontariât vivarôs e bon di fâ pardabon dal ben, mai strac di judâ cui che al à bisugne.
ELENA ZANUSSI