SPECIÂL – Ti vuei… donâ

I events dolorôs des ultimis setemanis in Abruç nus àn dât ancjemò un esempli di ce che e je «la braure furlane». Cualchi numar de Patrie indaûr o vevin intervistât il president de AFDS (Associazion Furlane Donadôrs di Sanc) Renzo Peressoni, che nus veve spiegât, dâts ae man, che il Friûl e je la prime regjon taliane in fat di donazions di sanc. Secont lui, chest fat al è dât de grande sensibilitât dal popul furlan daspò lis tantis soferencis patidis (taramot, vueris, e v. i.).
Po ben, al è un altri don che, ancje se inmò cuntune cierte dificoltât, i furlans a san «regalâ»: i orghins. O vin sintude la presidente regjonâl de Associazion Donadôrs di Orghins F-VJ Onlus, la dotore Gloria Aita.
LA NASSITE_ Nassude uficialmentri ai 15 di Avrîl dal 1976 a Udin, la associazion e intindeve sedi rinfuarcî la solidarietât e la culture dal don, che difondi il concet di prevenzion des malatiis.
Di in chê volte e je cressude simpri di plui, no cate che no si sinti a fevelâ dispès di donazion di orghins e che la stampe e i mass media no tratin chest argoment cu la juste atenzion.
Par chest motîf, un dai prins pas che a son stâts fats al è stât chel di informâ e di sensibilizâ i citadins, partint propite dai bancs di scuele, informant i zovins sui stîi di vite corets par restâ in salût, sui dams dal alcul e des droghis. Une prevenzion duncje a 360°, par tutelâsi in câs di une dibisugne, magari cussì no, di traplant.
Par chel che al rivuarde l’aspiet legjislatîf, in Italie la leç plui incisive e je la n. 91 dal Avrîl 1999: cun chê, si invidin lis associazions di volontariât a sensibilizâ la popolazion par difondi une corete informazion. Cun di plui, la regjon Friûl-Vignesie Julie e à emanade une norme che e proviôt la assunzion des spesis funeraris e di traspuart pai donadôrs, par slizerî i disasis ai familiârs.
PROGJETS_ Par cumò a son in at progjets ministeriâi e regjonâi che a dimostrin une volontât des istituzions di intensificâ lis ativitâts di formazion intes scuelis e intai sportei comunâi, l’inzornament dai miedis di base e chel des Fuarcis Armadis. Cun di plui, si ponte su la formazion di mediatôrs culturâi par sensibilizâ i gnûfs citadins. Ma lavôr chi in Italie a ‘nd è inmò tant di fâ, nus spieghe la dotore Aita, no si rive ancjemò a dâ une informazion corete, a superâ i lûcs comuns e a fâ un pocje di clarece su tancj aspiets che a rivuardin i traplants, e, soredut, sui procediments di declarazion di muart cerebrâl e su lis relativis proceduris sanitariis.
Di fat, ancje dopo la leç numar 91/99, e je mancjade la emanazion dai decrets atuatîfs che e à di fat rindude inutile la leç che e voleve un coinvolziment gjenerâl dai citadins sul teme de donazion.Inmò no esist la atuazion dal assintiment cidin, o ben che se un nol declare nuie in automatic al deventi donadôr ae sô muart. Duncje, i unics mûts al dì di vuê par donâ i orghins a son:
– une declarazion scrite;
– la donocard, un tesserin distribuît cence spesis de ADO-F-VJ che al à dentri i dâts anagrafics, il codiç fiscâl, il numar di un document di identitât e la manifestazion di volontât al don dai orghins;
– il consens dai familiârs plui strets.
LA DIFUSION_ Ma cemût si movie la associazion? Cu la sensibilizazion a ogni nivel, come che o vin za dite, massime viers i zovins che, daûr de opinion de dotore Aita, a rispuindin une vore ben a lis tematichis dal don. Ma nus la responsabile nus vise ancje che al è impuartant fâ rêt, condividi cun altris associazions lis ativitâts, come cun chê dai traplantâts e dai familiârs dai donadôrs, o ancje cu la AFDS. Buine ancje la colaborazion cu la Federfarma e cul Ordin dai Farmaciscj. E je essenziâl – al è clâr – ancje une sinergjie cul Centri Regjonâl Traplants.
Une colaborazion resinte si è strenzude cu la Universitât dal Friûl: di fat, la retore Cristiana Compagno e à dât bon acet ae propueste de ADO e de AFDS di vierzi la Universitât a incuintris di informazion, e ancje il Consei dai students al à condividude la linie de retore.
PRIMÂT_ Cualchi dât in particolâr sul Friûl: intal 2008 o vin otignût il primât nazionâl di donadôrs cul 32,9 par milion di popolazion. Dal inizi de ativitât di prelêf in regjon, i donadôrs a son stâts plui di 500 e tal 2005 al è stât passât il travuart dai 1.000 traplants.
I traplants di cûr fin vuê a son stâts plui di 400; tal 2008, chei di fiât a son stâts 30 e 40 chei di rognon. Tai prins trê mês dal 2009, a son stâts fats 21 traplants di rognon, ancje tra vivents, ridusint i timps di spiete di siet mês: i plui bas a nivel nazionâl.
Par concludi, la dotore Gloria Aita e sosten che chescj risultâts slusints a son dâts de gjenerositât dal popul furlan che no si sparagne tes dificoltâts, ma ancje de fiducie intes struturis sanitaris dulà che si cjate professionalitât e umanitât.
Venusia Dominici