SPECIÂL – Il CeVI, volontariât cence confins

In Friûl-Vignesie Julie e je tante la int che si da di fâ tal volontariât. Cui te culture, cui te glesie, cui pal ambient o, par esempli, te solidarietât internazionâl. Al è chest il câs dal Ce.V.I., Centri di volontariât internazionâl pe Cooperazion dal disvilup. Nassût a Udin tal 1984, al lavore pe solidarietât e par scombati lis injustiziis ator pal mont, dant une man a cui che al à plui dibisugne.
Il Ce.V.I. al lavore cence cjalâ i confins politics, dal Nord al Sud dal mont, in colaborazion cun organisims di ducj i Paîs, metintsi adun cu lis associazions dal puest par condividi obietîfs e par miorâ la cognossince framieç de int.
Il Ce.V.I. – al spieghe Piero Imbriaco, president dal Centri – al fonde lis sôs lidrîs suntun principi: il rispiet dai dirits de persone. «Il Ce.V.I. – al conte Imbriaco – al è nassût tai agns Otante de voie di un grup di cuindis personis di fâ alc di concret pes cuestions de cooperazion e des injustiziis sociâls. In dì di vuê, il Centri al à plui o mancul 40 volontaris atîfs e passe cent socis che a sostegnin la ativitât».
Une rêt di solidarietât «che e je un altri mût di lei il mont», che e podarà cressi di plui ancje in gracie di altris rapuarts di colaborazion – doprant e slargjant i contats cui ents publics –, di studis, e cu lis associazions presints in plusôrs Paîs.
Di fat, i progjets dal Ce.V.I. si davuelzin di ogni bande: in Afriche come in Americhe latine, ma ancje in Italie, dulà che e je une vore fuarte le ativitât di formazion. «Il volontariât tal Ce.V.I. – al zonte Imbriaco – al rapresente ancje la oportunitât pe int di fâ une esperience impuartante».
«In Brasîl, par esempli, e je in vore une convenzion cul Ateneu furlan par dâ la pussibilitât ai students di fâ ativitât di tirocini tai setôrs de economie rurâl e de agrarie».
I progjets a son difarents tra di lôr par logament gjeografic, par grandece, par realtât sociâl e economiche e par teme. «Tai progjets – al dîs Imbriaco – si confrontin problematichis difarentis, propuestis e iniziativis che a saltin fûr de volontât dal Centri e dai ents locâi di inserîsi tes dinamichis locâls par dâ un contribût a miorâ lis condizions di vite».
Decidût di infuartî la sô adesion al model di svilup sostignibil, lavorant in relazion cun diviers interlocutôrs, il Ce.V.I. al ponte in particolâr su la educazion e su la formazion tant che fatôr fondamentâl di cambiament. «O organizìn ancje viaçs di informazion par fâ cognossi di dongje a la int i problemis di tancj Paîs dal mont».
«No sin une organizazion cetant grandonone – al rimarche Imbriaco – ma o lavorìn cun profit e cun sodisfazion di ducj. Al è tant ce fâ.
O sielzìn i progjets cun atenzion – al finìs Imbriaco – e si spindìn par puartâju indevant cu la colaborazion di tante int gjenerose ».
Sonia Sicco