SPECIÂL – Si pues fâ ancje cence alcul

Pensâ a un furlan cence il tai in man al è dificil. E pensâ a une sagre dute cence alcul, ancjemò di plui. E sune come une sfide. Une scomesse.
Vinte, però. Sì sì, o vês let ben. Propit vinte. L’an passât, inte «Sagre dal Perdon dal Tor» a Tor di Zuin, no si à vendude nancje une butilie di vin, une bire, une sgnapute. Nuie di nuie. Dome bibitis, strucs e cocktails analcolics, creâts pe ocasion. E la int e je corude in tante. Plui di simpri. Plui di ogni altre «Sagre dal Perdon». E à cerçât incurioside, si è complimentade cui organizadôrs e e à ancje criticât. «Plui di cualchidun nol à condividût cheste sielte analcoliche – al conte don Luca Anzilutti, predi di Tor di Zuin – però al è vignût a fâ un zîr pe sagre». Don Luca, 38 agns, di 3 plevan dal comun de Basse, al è propit content dal sucès. «Une idee che e je nassude dal Consei pastorâl – al ten a rimarcâ Anzilutti –, che no à volut sei une «vuere sante» cuintri il tai ma dome la ocasion juste par stimolâ une discussion sul teme dal alcul». La parochie di Sante Marie Assunte e à mandât in ogni famee une letare par spiegâ la motivazion di cheste iniziative. Al jere scrit: «Al di là des statistichis uficiâls che a fevelin, in Italie, di 4 milions di alcoliscj, al bastarès no sierâ i voi denant di dutis lis situazions di soference che l’alcul al puarte tai nestris paîs. Cun cheste propueste, o savìn di no podê risolvi il probleme ma almancul o alcìn il vêl su la cuestion». E cussì ai 15, 16 e 17 di Avost dal an passât, tai barachins de sagre si à stât in compagnie bevint Elisîrs di Rocchetta, Chinot, Fanta, te, bevandis fatis cui sirops di pomis e la mitiche, antighe «spume». A son stâts vendûts 407 cocktails analcolics, dal «Nursery fizz» al «Florida», dal «Cenerentola» al «Vento del Sud». A jerin almancul dîs di sielzi. Tant che al è stât inmaneât un concors par votâ chel plui bon.
Te domenie, ae sagre, al è rivât ancje il scritôr Pino Roveredo, vincidôr dal Premi Campiello 2005, che al à vivût su la sô piel il probleme dal alcolisim, e che lu à contât tai siei libris. Un incuintri cun testemoneancis e riflessions che, chei che a jerin li presints, a àn ancjemò tal cjâf. Ce dî di plui? La scuadre che e vinç no si cambie, e ancje Tor di Zuin e je convinte di cheste robe. Duncje, apontament cu la seconde edizion de «Sagre analcoliche dal Perdon dal Tor», ai 15, 16 e 17 di Avost dal 2009.
Valentina Pagani