IL GRANT LUNARI DAL FRIÛL. Mai

IL SORELI, LA ATMOSFERE, LA NATURE
Te prime setemane dal mês il soreli si cjate jenfri l’ecuinozi de Vierte e il solstizi de Istât e e va indevant la sô corse celeste viers il solstizi di Jugn, scjaldant aromai in maniere slargjade. Il cicli stagjonâl al è te sô plenece e al pant dut il so sflandôr. La vite vegjetâl e chê animâl a prolifichin e dut al è plen di vivôr.
VORIS DAL CICLI AGRARI
Prin sfalç des jerbis tai prâts e, une volte (dal Sietcent ae seconde metât dal Nûfcent), timp di arlevament dai bigats su lis gridelis. A tachin lis sborfadis tai filârs des vîts cul sulfât di ram e si spontin i butui. Tai orts lis feminis a semenin intal zovin di lune lis ortaiis a produzion estive, saladis, lidrics, indiviis, savôrs, carotis, bledis, e a tornin a plantâ intal vecjo di lune ai, pomodoros, melanzanis, capûs, verzis, pevarons, selinos, cardis, puars, cudumars, cucins, cauliflôrs e basili. In zardin si rinvasin in contignidôrs plui grancj plantis e rosis, si curin i tapêts di jerbe cun coltadis di pueste e si netin i cjanâi li che a corin lis aghis. Te cjanive si controle ancjemò l’andament dai vins e la temperadure dal ambient cu fâ cori aiar di pueste, intant che si da la plene tignint costante la aghe tes bots. ❚
Mario Martinis