IL FERÂL. A novante agns dal “stragjo inutil”

Introduzion: 10 agns indaûr pre Antoni Beline al à scrit cheste riflession in ocasion dal aniversari de jentrade in vuere de Italie. Chest an che a colin i 100 agns e dopo che pape Francesc al à fat visite ai cimitieris militârs talian e asburgjic di Redipuie, il toc al è inmò plui di atualitât e us riproponìn chestis sôs peraulis dedicantlis soredut a chei che dopo dut chest timp no si rindin cont che la retoriche no pues jessi la clâf di leture de storie: “Si continue a celebrâ la vuere cu la scuse di celebrâ lis vitimis de vuere…”.
***
A son passâts novant’agns, une eternitât!, di chel 24 di Mai dal 1915 tant celebrât tal inmagjinari coletîf e tant pompât te retoriche nazionalistiche, cuant che la Plâf, “fiume sacro alla Patria”, e à tacât a murmuiâ al passaç dai prins fants che a levin a cuvierzisi plui di pantan e di feridis che di glorie. I ultins, ustinâts paladins di cheste date fatidiche, che no vuelin inmò rindisi che chê zornade e chel fat a son stâts la prime grande tragjedie dal popul talian, a cjataran dutis lis scusis par une enesime, patetiche, periculose celebrazion, esaltazion, mitizazion di un event negatîf.
DEFINIZION IMBRUCJADE_ Ma l’inizi de prime vuere mondiâl, mari di dutis lis vueris e soredut de seconde, inmò plui tragjiche e insensade, chest an al à un motîf di plui par jessi ricuardât. Un motîf storic e ancje religjôs, peât al gnûf pape, Josef Ratzinger, che al à volût riclamâ il non di Benedet XV. Un pape che al à durât pôc, dal Setembar dal 1914 al Zenâr dal 1922 e che al à spindût grande part dal so pontificât a sconzurâ i popui a cessâ dal flagjel che al incenerive e al sassinave la Europe e a medeâ lis feridis di chest maçalizi. Di lui e je restade la definizion plui imbrucjade, e par chel odeade, de vuere che e à parât in sflichignis la Europe, e à fat saltât ducj i imperis, e à jemplât di muarts lis trinceis, di ferîts i ospedâi, di mats i manicomis, di vuarfins e di veduis lis cjasis, di miserie nere lis fameis. Le à clamade, il 1 di Avost dal 1917, e duncje cun cognizion di cause e no su la emozion dal moment, il “stragjo inutil”.
LA VUERE INUTILE_ La inutilitât di chê vuere, e ce vuere!, e jere tant evident che dome un vuarp o un trist o un stupit nol podeve inacuarzisi. Inutil parcè che, impen di disgropâ lis cuistions internazionâls, lis ingredeave. Parcè che e jemplave di velen une Europe za vonde dividude par vie dai stâts nazionalistics. Parcè che e fiscave, in pôc timp e in maniere insensade, dut ce che si veve rivât a cumbinâ e a ingrumâ cun tant di lavôr, di inteligjence e di progrès. Parcè che, come che si à viodût, e preparave lis atrocitâts ancjemò plui spaventosis dal secont conflit. Mai come in chê volte la “Conference di pâs” e à vût un non plui fals e cinic. Tal câs, po, de Italie, e je stade inutil parcè che la Austrie nus varès cedût Trent e Triest cence tantis vitis, tratantsi di no vierzi un altri front. Ma i sorestants talians ancjemò une volte a àn preferît frontâ la disaventure de vuere par che la int no si visàs dai tancj berdeis di cjase nestre. A disevin che al coventave un “batisim” pe gnove nazion e il batisim al è stât, trement. I catolics che, par fedeltât al vanzeli e par coerence religjose, a varessin vût di ribelâsi, no lu àn fat parcè che a spietavin la ocasion par paiâ cul sanc la lôr legjitimazion come fuarce sociâl e i vescui a àn sunade la diane di vuere par no passâ par disfatiscj e finîle di là dai gàtars. Il vescul di Udin, A. A. Rossi, il plui leon e il plui farneticant di ducj, si è tramudât in cunin, scjampant in Italie e lassant i plevans e la int a cjapâlis dai todescs invasôrs e dai talians vincidôrs. Une disfate morâl prime che strategjiche, che nissune retoriche no à rivât e no rivarà a taponâ.
IL VOLI DAL BURLAÇ_ Ma une vuere no je mai inutile, parcè che e je une tragjedie di cuant che e scomence a cuant che e finìs, se mai e finìs. E il colm di cheste pagjine disgraciade si à vût propit chi di nô, tal confin orientâl, là che plui cruentis a son stadis lis bataiis e plui profondis lis feridis. Chei che a àn timp e buine volontät, che a ledin a leisi no i proclamis di vuere, fabricâts pe opinions publiche e fals di insom fin dapît, ma i diaris dai plevans e i libris storics des plevaniis, là che e ven contade dì par dì cheste Viacrucis. Il Friûl, tiere scognossude ai plui e dismenteade des autoritâts centrâls, al è deventât il voli dal burlaç, cun miârs di soldâts e cjars, cjasis e scuelis strafuidis par necessitâts belichis, cun ferîts di ogni sorte, cun spavents fûr di misure. I todescs che a jentravin pes cjasis a puartâ vie ce che si veve rivât a salvâ, i militârs che a comandavin di parons e no vevin nissun rispiet ni dûl de int. Parfin lis cjampanis tiradis jù o butadis jù dai cjampanîi par fânt canons. E po la disfate di Cjaurêt cu la profugance, il tif e la spagnole e vie. Cui plevans che a passavin des invocazions “a peste, fame et bello, libera nos, Domine”, ai Tedeums par une vitorie inventade.
Ce che la int no sa, parcè che nissun nol à mai olsât a contâi, al è il cjapitul umiliant e scandalôs des decimazions, ordenadis di graduâts cence competence ni cussience cuintri soldâts cence nissune pussibilitât di difindisi. Tra lis tantis, masse vitimis, dal prin flagjel dal secul, a van contadis lis schiriis di soldâts mandâts a murî plens di pôre e di alcul, cui capelans militârs che ur davin la assoluzion gjenerâl a chês pioris di macel. E chei fusilâts fûr des glesiis o tai mûrs dai cimitieris, cul disonôr di une patrie che e disonorave la lôr frescje zoventût.
TIMP PASSÂT DIBANT_ Il timp al è passât, anzit svolât. Ma nancje a distance di scuasit un secul no si rive a resonâ, a jessi obietîfs, a clamâ lis robis cul lôr non. Si continue a celebrâ la vuere cu la scuse di celebrâ lis vitimis de vuere. Si continue a fevelâ di valôr là che il valôr, la inteligjence, lis cualitâts umanis di tante zoventût a son stadis soteradis te maniere plui stupide e criminâl. Si va denant dai monuments cence fâsi un esam di cussience, cence imparâ nuie nancje de disgraciis. E il piês al è che, tai paîs de Cjargne che plui a àn paiât cheste matetât, e continue a ardi la flame de stupiditât, clamant nemîs chei che nus àn dât di vivi par secui e osanant chei che a àn seselade la plui biele etât dai nestris paîs. ❚
pre Antoni Beline
(publicât su La Patrie dal Friûl n 5 dal 2005)