La Glesie e clame ai Stâts Gjenerâi dal Friûl

O publichìn la predicje di bons. Guido Genero, Vicjari gjenerâl de Arcidiocesi di Udin, in ocasion de Messe pe Fieste dal Friul in Domo a Cividât.
La liturgjie che o stin celebrant nus poie tal cûr des fiestis di Pasche floride, memorie dal Signôr resurît. La fieste dal popul furlan e cole juste su cheste zornade de vierte che nus invide a une stagjon di sperance. Trê considerazions i ten a esponius.
LA IMPUARTANCE DAL FAT (1077). Za fa dongje mil agns, la nestre tiere e a vût un ricognossiment cetant grant: l’imperadôr nus da une autonomie che, stacant il Friûl de marche di Verone, lu fâs deventâ un stât tal mieç de Europe, sul confin orientâl. Cheste creazion politiche si poie suntune realtât eclesiastiche za viele e tradizionâl, il patriarcjât di Aquilee, in mût che si unìs il podê civîl a chel religjôs, intune forme che i timps a permetevin, ma che in dì di vuê no lu capiressin, par vie de juste indipendence dai doi cjamps. Cun di fat, si è corût il pericul di miscliçâ il baston pastorâl cu la arme de spade, il mût de aministrazion statâl cu la cure spirituâl.Chest aspiet po ben nol stude par nuie il tentatîf di fâ vivi la Patrie cuntune sô libertât e une sô fuarce.
LA RILEVANCE DE IDENTITÂT. Intal moment di vuê, al somee che se un al rivendiche une identitât e une diference al vueli meti in cuistion la unitât e la compagnance di ducj. Al contrari, si à di podê vê cure des sô lidrîs e de sô storie come figure speciâl e muse tipiche di ogni popul. Similmentri a ce che al sucêt pe fede catoliche: si le professe compagne in dut il mont, cence dineâ lis culturis e lis lenghis di ogni teritori che al vedi une sô personalitât ricognossude. Inte glesie catoliche a ‘nd è passe sietcent. Si che duncje, ancje cu la fieste de Patrie nô o mostrìn che ogni int e pues e e scuen tornâ a cjatâ la sô identitât e la sô storie, dant cussì une sburtade ae cussience e ae braùre di cualsisei popul dal mont.
PLUI INTESE TRA FURLANS. Come che si sa e si viôt, al dûl il cûr tal constatâ ce tant dividûts che a son stâts e a son ancjemò i paîs, i teritoris, lis ideis e lis oparis dai furlans, parfin tal difindi o tal confermâ l’autonomisim legjitim. Chest fruçonament che al spache lis fuarcis e al indebulìs la propueste politiche, sociâl e culturâl al varès di jessi vinçût cuntun sfuarç di intese convergjente sui ponts essenziâi e sul mût di fevelâ e lavorâ pal ben dal Friûl di vuê e di doman. Su cheste linie mi permet di proponi ce che al e za stât provât tal passât, ven a stâi di pensâ, di preparâ e di davuelzi une volte ad an i stâts gjenerâi de Patrie dal Friûl, come par imitazion adatade dal antîc nestri Parlament furlan. E podarès presentâsi come une grande e oneste assemblee di tantis e di tancj, là che si scoltisi e po si cjape un orientament unitari sui argoments di impuartance par ducj. Mi pararès cheste une imprese degne e urgjente, doprade parsore des diferentis opinions politichis e dentri dal vivi dai furlans di ca e di ogni part dal mont. In curt: imparâ di chei che a àn za provât, schivâ i difiets di altris tentatîfs, agjì cun scletece e misure, crodint ducj ae buine cause. ❚
bons. Guido Genero