VIERS IL FRIÛL. Pocjis gnovis sul front di Sapade e Cint

Cun Setembar o sin jentrâts tal novesim mês di spiete pe aprovazion definitive dal passaç di Sapade-Plodn al Friûl. Il sît internet dal Senât al continue a presentâ lis propuestis di leç “De Monte” e “Bellot” fermis, bramosis di jessi esaminadis de Comission Afârs Costituzionâi dal Senât che si spere, cumò che la riforme de Costituzion e je stade aprovade in prime leture, e vedi timp par ricjapâ in man la cuistion dal paîs dal Cjadovri che al spiete dal 2008 la gnove Regjon. Stes discors al vâl ancje par Cint, in chest câs i mês di spiete a son “dome” cinc.
Come in dutis lis robis che a son sintudis però la fuarce di volontât par otignî l’obietîf finâl al pues rivâ a sfuarçâ i blocs de burocrazie e lis gjambadoriis. Par esempli il comun di Cint traviers dal so vicesindic Alessandro Coccolo, al sta lavorant par promovi une intese tra Venit e Friûl-VJ in fat di sanitât. Ai presidents Zaia e Serracchiani si à domandât che tal contest de riorganizazion de ufierte sociosanitarie, si slargi l’ambit teritoriâl fasint lavorâ insieme sedi i Ospedâi di Puart, San Donà e Jesolo, sedi chei di Sant Vît dal Tiliment, Pordenon e Tisane, in maniere tâl di frenâ la mobilitât des personis che a àn dibisigne di curâsi e che si spostin dal Venit orientâl viers la nestre Regjon. Si trate di un fenomin naturâl che no si pues dal sigûr pensâ di contrastâ ma al sarès logjic compagnâ e gestî in maniere corete. ❚
Il Cjargnel