Baston di Sant Pieri di Cjargne

Ai 2 di Avost, intune biele suaze di fieste e di cjants, te Plêf di Sant Pieri si è tignude la prime edizion dal Premi “Baston di San Pieri di Cjargne”. La iniziative e je stade metude in pîts de Arciconfraternite dal Spirtu Sant ‘Pieres vives’ par dâ public ricognossiment a personis o a grups di personis che si son metudis in lûs pal lôr impegn spirituâl, culturâl e artistic, sociâl e umanitari, ispirât a valôrs cristians, a servizi de societât umane e de comunitât cjargnele in particolâr.
‘Il Baston di San Pieri’ al è il simbul di un cjaminâ tal segn dal Vanzeli e dal progrès spirituâl e civîl de umanitât: di fat, il premi al ven dât a une persone che e presente une vite di esempli daûr dal Vanzeli e che e opere pal ben de societât.
La Confraternite e je une istituzion che e à par finalitât la promozion di une caritât spirituâl, culturâl e sociâl pal popul di Diu e par ducj, e e cure ancje la conservazion e la protezion de Plêf Mari di Sant Pieri.
Chest an, la Zurie nomenade dal Consei Diretîf de Confraternite e jere formade di Bons. Pietro Brollo, Antonio Martini (ex president dal Consei Regjonâl), Battista Molinari (sindic di Zui), Bons. Giordano Cracina (prevost di Zui) e Renato Cracina (gjornalist). Lis personis sielzudis pal premi a son stadis: Bons. Tito Solari, nassût a Pesariis e vescul di Cochabamba in Bolivie; Giovanni Canciani di Paulâr, musicist di fame internazionâl e Marta Francescatto di Tumieç, colone impuartante de Comunitât Piergiorgio di Cjanive di Tumieç.
Ai premiâts ur è stât consegnât il ‘Baston di San Pieri’, la figure dal sant in len intaiât suntun mani di vilût di colôr zâl pal cjamp spirituâl, blu par chel culturâl e ros par chel sociâl, e une pergamene scrite a man cu la motivazion personâl di assegnazion.
A Bons. Tito Solari i è stât dât il premi pal so impegn tal cjamp spirituâl par “une vite interie dedicade ae glesie cun particolâr atenzion ae difese de pâs, dai dirits e de dignitât dai popui tibiâts e maltratâts de Americhe Latine, tal spirt plui gjenuin che si supe dal Vanzeli”.
A Giovanni Canciani pe sô opare cence poste tal cjamp culturâl e artistic e soredut par “une vite interie dedicade al mont de musiche e de culture, cun particolâr traspuart tal insedâ tai zovins chestis passions, e lassant une olme marcade tal museu ‘La Mozartina’, di lui metût in pîts a Paulâr”.
Marta Francescatto e je stade sielte pal so lavôr tal cjamp sociâl e umanitari par “une vite interie dedicade, tal cidin, aes personis mancul fortunadis te Comunitât Piergiorgio, prime a Udin e po a Cjanive di Tumieç“.
Il premi al varà une cadence bienâl. Cui che al vûl (tant personis che ents o associazions) al podarà mandâ la propueste cuntun piçul curriculum de persone candidade dentri dai 31 di Dicembar dal 2015 ae Confraternite (te sede de Polse di Cougnes, intal Comun di Zui). ❚