Bankitalia aie cambiade idee?

Sintît cheste, e je miôr di une barzalete. Si visìno ben di dut chel che nus àn contât cuant che a àn fat a tocs e svendût grant part dal sisteme creditizi regjonâl (Bancje dal Friûl e Popolâr Udinese prin di dut, e po la Bancje popolâr di Pordenon e la Crup, ladis a finî in timps e mûts diviers a grups nazionâi)? La storie dal “nanisim” dal sisteme locâl, de dibisugne di cirî agregazions, di cressi par frontâ i gnûfs senaris di un mont simpri plui globâl e competitîf e podê judâ miôr il teritori? Dopo e rive la crisi e… sorprese! Anzit, sorpresute!
A contânus cheste storiute simpatiche e je la Bancje di Italie, che intal so rapuart su la economie regjonâl dal F-VJ 2013 (presentât di resint), dâts ae man, nus dissegne une altre realtât. “In F-VJ lis bancjis locâls a àn rivistît in maniere tradizionâl un rûl di rilêf – e sclarìs Bankitalia –. Dilunc dal periodi de crisi, i prestits erogâts des bancjis locâls a àn mostrade une dinamiche cuasi simpri superiôr a pet di chê di chei altris intermediaris… Dal 2007 la cuote dai prestits des bancjis locâls e je cressude di plui o mancul cuatri ponts percentuâi; la incressite e à interessât sedi lis fameis sedi lis impresis e e je stade plui intense par chestis ultimis”.
Si podarès obietâ che forsit lis bancjis locâls a àn aumentade la lôr cuote di marcjât magari midiant operazions pericolosis che i istitûts “no locâi” a àn vût miôr evitâ: ma ancje chi Bankitalia nus dîs che “tra il 2007 e il 2013 il decjadiment (il tas di gnovis soferencis sui prestits vîfs) pai prestits erogâts des bancjis locâls al è cressût dal 1,3 al 3,4%” – cuntune acelerazion fuarte intal ultin an – intant che “intal stes periodi pes bancjis no locâls al è cressût dal 1,1 al 3,7%”. Insume, lis bancjis locâls no son stadis plui “cence scrupui” dai grancj istitûts nazionâi, ma dal sigûr a àn judât plui il teritori. E soredut il tiessût produtîf fat di impresis piçulis e une vore piçulis.
Nus al conte simpri Bankitalia: lis bancjis locâls ae fin dal 2013 a detignivin une cuote di marcjât dal 30,5%. Dal 2007 al an passât, la cuote di marcjât relative ai finanziaments aes fameis e je passade dal 26,1 al 28,7%, chê relative aes impresis intal complès dal 26,5 al 31,6% (intal detai: piçulis impresis, dal 39,7 dal 2007 al 45,8% dal 2013; mediis e grandis, dal 22,4 al 27,1%). Insume, a sostignî la economie – che in regjon e je fate pe cuasi totalitât di piçulis e microimpresis – al è tant dispès il credit locâl, il Davide cuintri Goliath.
E je dopo une altre considerazion. Simpri Bankitalia nus informe che ae fin dal 2013 a jerin presintis in regjon cun propris sportei 33 bancjis no locâls (5 cun sede in regjon) e 24 bancjis locâls (17 cun sede in regjon: di chestis, 15 a son Bcc, une la Popolâr di Cividât); dai 908 sportei bancjaris, cuasi i doi tierçs (594 cuintri 314) a son di bancjis no locâls. Che, dal 2007 a vuê, a àn viodût restâ in sostance stabii i rapuarts di finanziament par sportel bancjari (di 735 dal 2007 ai 729 dal 2013, cuintri i 528-493 dai istitûts locâi), ma aumentâ in maniere considerevule il numar di conts di dipuesit par sportel bancjari (passâts di 1.372 dal 2007 ai 1.677 dal 2013, par ce che al tocje apont i istitûts no locâi; intant che a son lâts jù di 1.198 a 1.075 chei dai istitûts locâi). In pratiche, al pâr di capî, intant che lis bancjis locâls si “esponin” sul front impleis, lis bancjis no locâls a continuin invezit a sburtâ su la racuelte. Si sa che il Friûl al è stât simpri un teritori “interessant”, sot chest aspiet. Dome che i sparagns dai furlans a van a miorâ i belançs dai istitûts che no son locâi e che a pain lis tassis inaltrò, duncje cence un benefici diret pe Regjon, che lis sôs cassis a vain za avonde.
Il ritrat dal credit regjonâl in timp di crisi che nus ufrìs Bankitalia al pues jessi un bon element di riflession… Lis bancjis a son pierdudis, lis multiutilities ancje; sul setôr dal lat e dai siei derivâts, par cumò, si à metût un “blec”. La esperience nus insegne che la storie si ripet: a ce tocjaraial cumò? Di sigûr al è che, stant i precedents, o tornarìn a colâi. ❚
✒ Linux