Sfuei Mensîl Furlan Indipendent
Archivi de Patrie

Si impiin i fûcs par slontanâ il spauraç dal eletrodot

............

In Cjargne si torne a sintî puce di eletrodot, che par aiar al varès di colegâ la centrâl di Somplât cun Wurmlach, il prin paîs di là dal pas di Mont di Crôs. Une storie che e va indevant di cuasi dîs agns tra progjets, cjartis, beghis, bataiis. Cheste volte però si è rivâts, tal mês di Lui passât, ae aprovazion definitive dal Ministeri dal Ambient e dal Ministeri dal Disvilup Economic che e dîs in sostance che la linie di interconession energjetiche tra Italie e Carinzie si pues costruî, tignint iniments però une schirie di prescrizions, passe 50, in maniere tâl di tutelâ il teritori. Autorizâ une linee cun pilons di sessante metris par dopo dî che si à di stâ atents al ambient al è za un cuintrisens grant come une cjase ma tant al è… Cumò vint chest “vie libare” dal nestri Guvier, la societât proponent e sta spietant lis stessis cjartis di bande austriache e po dopo e varès di vignî convocade la gnove Conference di servizi Stât-Regjon pe autorizazion definitive.
Intant citadins, aministradôrs locâi e Comitâts a son za tornâts sul pît di vuere e ai 16 di Avost par dâ un prin segnâl in sîs puescj diviers de Val de Bût a àn impiât un pâr di fugarons, in contemporanie cun chei dal Comitât Pro Gailtal che a àn fat la stesse robe di là dal confin.
Une aleance transfrontaliere che no mole dal 2007, cuant che propit sul Pas di Mont di Crôs si veve organizât la prime manifestazion par dî di No al eletrodot.
I rapuarts cui carinzians ju àn strenzût ancje i sindics dai comuns interessâts dal passaç de linie e intune riunion des setemanis passadis a àn ribadît la lôr contrarietât ae linie par aiar, tornant a domandâ che si sielzi la ipotesi de linie sot tiere.
Si è fate sintî ancje la presidente Serracchiani che e à clamât dongje i tecnics e i imprenditôrs dal grup che al sosten l’investiment (Pittini, Fantoni, Burgo) par fâ il pont de situazion, par dopo declarâ che si tignarà di voli la vicende in stret contat cui comuns, si valutarà dutis lis cjartis par fâsi cjatâ pronts cuant che si varà di cjapâ la decision finâl ma e à dit ancje une frase che no lasse spazi a fraintindiments: “fin dal imprin la ipotesi di passâ sot tiere e je stade escludude parcè che no je sigure in câs di vuast oltri che no jessi sostignibile dal pont di viste economic”. Un altre partide che si varà di zuiâ su cheste cuistion e rivuarde però ancje la disponibilitât di energjie trasferibile tra i diviers Stâts. No stin a dismenteâsi che tra Paluce e Mauthen al è za stât autorizât un altri eletrodot, cun linie sot tiere, di bande de Secab.
Tai prossims mês la Regjon e sarà metude ae prove, cussì come lis promessis che la Presidente e veve fat in campagne eletorâl. Une robe e je sigure, cognossint la determinazion che i Comitâts a àn vût in chescj agns: la proteste cuintri i pilons no molarà di un centimetri e cualchidun par rindi la idee al tache a impensâsi ce che a vevin fat ai pilons de corint i sudtirolês tai agns setante. ❚
David Zanirato

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +