SIMPRI BOGNS. “Pieri Pičul, Storie dal popul furlan”, Reane 2012

“Une dì dal mês di Vierte adalt, su la Tencje, daûr il çuc cuasi a straplomp su la Bût, si alçà un fîl di fum. Di façade, a miege mont Paulâr, un frut al jessì imburît de lobie, al montà e dismontà la prime e la seconde maserie, disponudis come murais di difese, al traviersà ben svelt il splaç disboscât che al jere in rive jù e come un gjat si rimpinà sul grant peç…”
Cussì e scomence cheste storie dal popul furlan, publicade pe prime volte intal 1974 e cumò rieditade cul contribût de Provincie di Udin, simpri par cure de Clape Hermes di Colorêt e de tipografie Cjandet di Reane. E je stade riviodude la grafie, modificade la temporalitât verbâl e normalizât l’aspiet lessicâl par meti ancje cheste opare in linie cul proces di normalizazion linguistiche che al è in vore. Cussì al spieghe Marc De Agostini inte premesse. La presentazion e je dal president de Provincie. Po o vin une curte biografie dal autor e il premabul di pre Pieri stes.
L’intent al jere chel di scrivi une storie che e fos a la puartade dai zovins des scuelis mediis e, cundifat, no son rârs i câs là che l’autor al si indrece diret ai cjars scuelârs o ai cjars letôrs. Ma nol è nuie di plui dificil che scrivi sempliç, massime suntun argoment cussì intrigôs tanche che la storie. Pre Pieri al ten il timon dret de bande che al à decidût di lâ, ma la materie e je daspes masse complesse par rindile cun peraulis facilis, cence cori il risi di banalizâ i grancj acjadiments e finî par no capîju. Par no dî des sfilzis di nons che ogni storie e puarte simpri cun sé. Nancje sedi obietîf nol è facil pal storic che al à une ipotesi di dimostrâ, in chest câs che il popul furlan al è un popul e nuje di mancul che un popul. E alore o cjatarìn dispès peraulis come … ‘par dî il vêr…’ o ben ‘al va dit ancje che…’. La impostazion eclesiastiche de ricercje si le olme benon (l’autor al è un predi…), ma no disturbe la comprension dai acjadiments.
Il libri al è insiorât di tredis disens fûr di test dal artist Lucardi e di une sorte di postfazion di pre Checo Placerean, plene di morbin e di scoreadis cuintri lis ipocrisiis dai potents. Lu completin sedis cjartis geografichis-storichis, disegnadis di Zorz Jus, che a formin une sorte di atlant storic dal Friûl, fotografât intai varis moments de sô tormentade vicende storiche.  ❚
✒ Laurin Zuan Nardin