Sfuei Mensîl Furlan Indipendent
Archivi de Patrie

Trop furlan te Joppi?

............

Se o lês sul sît dal Sbhu (Sisteme bibliotecari dal hinterland udinês) fracant la sezion di “ricercje” o larês a cjatâ une sezion evidenziade, il “Catalic corint”: la liste di ducj i documents in lenghe furlane o su la lenghe furlane che la Biblioteche Civiche “Joppi” di Udin e à tal so patrimoni di 600 mîl titui. Se al è stât possibil rindi disponibil chest patrimoni on line, al è stât in gracie di un dai progjets plui impuartants puartâts indevant cui bêçs pal furlan, che però cumò al è fer di doi agns parcè che dal 2013 de Regjon nol ven plui un franc: o stìn fevelant de Bibliografie Furlane Virtuâl, la inovative iniziative che e deve atuazion al articul 9 de Leç Regionâl 15/96, chel che al fevelave de Biblioteche Joppi di Udin come dal centri di catalogazion e digjitalizazion di dut ce che al inten la lenghe furlane a nivel librari, publicistic e multimediâl. Un progjet che al à metût dongje Biblioteche, Arlef e Societât Filologjiche e che cun risorsis nancje masse penzis (si fevele al plui di 60 mil euros ad an) al à permetût di rivâ a risultâts une vore significatîfs: “o vin digjitalizât dutis lis anadis dai plui vieris periodics dal Votcent e dal prin Nufcent – nus conte Romano Vecchiet, il diretôr de Biblioteche – e cussì o sin rivâts a rindi disponibii comodamentri di cjase a ducj i citadins e soredut ai studiôs e ai ricercjadôrs materiâi une vore impuartants che prin al coventave vignî in Biblioteche par consultâ”. I storics a son agrâts a Vecchiet parcè che nol covente plui spiçâ i voi e fruiâju par consultâ microfilms o cd, o fâ fature e spindi bêçs a fâsi fâ fotocopiis, ma la cronache e la storie de “Patria del Friuli”, dal “Giornale di Udine” (i doi sfueis plui lets dal tart Votcent) e dal “Popolo del Friuli”, cuotidian di ete fassiste.
Une enorme cuantitât di risorsis digjitâls e je cuindi pronte a jessi scuvierte di ducj i furlans a puartade di un clic. Chest progjet difat no si è esercitât dome sul passât, ma al jere ancje rivât a creâ un database une vore complet e esaustîf di dut che che al jere jessût par furlan e sul furlan jenfri 2007 e 2009. Pai prins doi agns la ricercje e la catalogazion e jerin stadis ancje stampadis su cjarte, dopo però i stanziaments de Regjon su chest cantìn a son planc planc vignûts mancul, finchè tal 2013 l’assessôr ae culture Elio De Anna nol à çoncjât dal dut il finanziament lassant a pît il progjet. La iniziative e cussì lade a fermâsi ancje se lis tantis ideis vignudis indevant in dut chest timp a spietin dome di jessi metudis in vore. “O vin un sogjetari dut par furlan e o sin pronts a rindi interatîf il catalic cun abstract e cuviertinis des publicazions – al spieghe Vecchiet – ma dut chest no si po fâ cence risorsis”. Dacuardi ancje l’assessôr ae culture dal Comun di Udin Federico Pirone che al fevele di un “progjet strategjic pe culture furlane, e che soredut al è un esempli di cemût che i contributs publics a puedin vignî spindûts ben e a benefici di ducj. Baste fracâ un boton e si viôt subite a ce che a son coventâts i bêcs impleiâts, ven a stâi a meti a disposizion di ducj un patrimoni di valôr incalcolabil. La storie interie di une comunitât”.
Pecjât cuindi lassâ murî une esperience dal gjenar. I apei al assessôr Gianni Torrenti a stanziâ alc pal 2014 a son lâts a vueit fin cumò, ma ni la Joppi, ni la Arlef a àn pierdût la sperance di cambiâ cheste inerzie che si è creade. “Il lavôr fat in chescj agns al è la dimostrazion di ce che si po fâ doprant pocjis risorsis e tantis inteligjencis – al siere Vecchiet – o sai che il moment de publiche aministrazion nol è dai miôrs par chel che al rivuarde il belanç, ma chi o vìn scomençât un lavôr che nus puarte ae avanguardie des minorancis talianis e forsit ancje europeanis, cuntun cost che in rapuart al benefici al è avonde limitât”. Al reste di viodi se e cemût che si podarà tornâ a inviâ il progjet che al à vût zaromai bogns risultâts ma si è fermât e al va tornât a meti in vore cun urgjence, parcè che dut ce che al è stât imbastît al merte di jessi inzornât e miorât inte sô fruibilitât. ❚
✒ Walter Tomada

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +