TERITORI – I erois di Basovize

Ogni popul al à i siei «erois di cjarte» ma, magari cussì no, al à ancje erois che a àn pierdût la lôr vite par combati a pro de libertât de lôr int. Chei slovens a àn a ce fâ soredut cu lis vicendis peadis ae seconde vuere mondiâl, e inmò prime – tes tieris subit a soreli jevât rispiet al Friûl – ae crude politiche antislave di Mussolini.
Jenfri i tancj che si podarès fevelâ, chei clamâts Bazoviški junaki (erois di Basovize, localitât sul Cjars dongje Triest), a son cuatri antifassiscj slovens copâts ai 6 di Setembar dal 1930, justeapont a Basovize: Ferdo Bidovec, Franjo Marušic, Zvonimir Miloš e Lojze Valencicč a faserin part de organizazion ilegâl Borba (Lote), nassude tal 1927 par dâi cuintri al regjim fassist che al puartave indevant une fuarte politiche di snazionalizazion sfuarçade. Condanâts dal Tribunâl speciâl pe difese dal Stât, i cuatri a forin fusilâts daurman.
Tal Setembar dal 1945, tal poligon militâr li che i cuatri a forin copâts, al è stât tirât sù un monument in lôr memorie; ogni an, ai prins di Setembar, la minorance slovene tal Friûl Vignesie Julie e inmanee dute une schirie di iniziativis par memoreâ il lôr sacrifici e, tai ultins agns, plui di cualchi rapresentant sloven (par esempli Dimitrij Rupel, cuant che al jere ministri dai Afârs Forescj) al à visitât il monument in forme uficiâl.
ALESSIO POTOCCO