Sfuei Mensîl Furlan Indipendent
Archivi de Patrie

TERITORI – Martin Krpan, eroi leterari sloven

............

Martin Krpan z Vrha (Martin Krpan di Vrh) al è il prin, impuartant libri de prose narative slovene. Si trate di une opare scrite te Vierte dal 1858 di Fran Levstik, che tal mês di Lui dal stes an le fasè vignî fûr sul gjornâl Slovenski glasnik; Levstik al fo il prin a pandi par sloven cemût che si podeve contâ storiis popolârs doprant un lengaç fevelât ogni dì de int comun.
Ma cui isal chest «eroi leterari» e ce rapresential pal popul sloven? Al jere un timp che Martin Krpan al jere tignût tant che l’om plui fuart di dut l’Imperi dai Asburcs; al jere un bon om, dut câs nol jere propit farine di fâ ostiis par vie che di mistîr al faseve il cuintribandîr di sâl che al puartave cu la sô mussute de cueste vie pai vilaçs. Une dì al fo clamât a Viene nuie di mancul che dal imperadôr in persone par dâi cuintri a un ciert Brdavs, l’om plui trist di chest mont: ducj chei che lu vevin scombatût a vevin fate une brute fin. Cun di fat Brdavs, grant e grues no mancul di Krpan, al veve la usance di taiâur il cjâf ai siei nemîs, e magari cussì no chel destin i tocjà ancje al fi dal imperadôr. Chest al veve bielzà clamât a cjapitul i erois plui innomenâts dal so Imperi, ma ducj a falirin; Martin invezit, dopo jessi lât a Viene, al rivà a bati il teribil Brdavs taiantji il cjâf e, prime di tornâ a cjase sô, come premi al otignì une sporte di bêçs di aur e soredut il permès a vite par podê traspuartâ sâl.
In dì di vuê, la storie di Martin Krpan e je inmò cetant cognossude jenfri i Slovens. Te narazion di Levstik si cjatin diviers riferiments a fats sucedûts tal 1848, an che al viodè il discjadenâsi di mots rivoluzionaris in dute Europe: la Slovenie, magari cussì no tant che il Friûl, e à simpri scugnût patî il domini di int foreste. Vie pai agns Krpan al à simpri figurât tant che eroi popolâr par definizion, incjarnant il caratar tipic dai Slovens, fat di vivôr, di fuarce, di indipendence e di un fregul di inzen contadin che nol fâs mai mâl. Insome, un personaç, un om fuartonon che al ve sucès vie pal mont, cjapât tant che model di bande di un piçul popul usât a scombati par rivâ a vê la sô libertât.
La storie di Martin Krpan e ve daurman un grant sucès: par esempli, in dì di vuê a Lubiane e je une scuele elementâr che e puarte il so non. E esist ancje une gare di prove di fuarce, nassude tal 1996 e inmaneade ogni an, li che il vincidôr al ven sorenomenât «Martin Krpan» par un an intîr. A puartâ il non dal nestri eroi parfin un grup musicâl rock, atîf jenfri la fin dai agns Setante e i prins agns Novante, li che al à cjantât ancje il famôs Vlado Kreslin.
La storie di Krpan e à vût mût di fâsi cognossi ancje tal forest, stant che la conte di Levstik e je stade voltade par talian, cravuat, ongjarês, todesc, macedon, svedês, slovac e spagnûl.
Al non dal eroi Krpan al è leât ancje un troi ciclabil dongje il lâc di Cerknica, a soreli jevât di Postumie: in dut a son uns trente chilometris di percors framieç dal vert, par gjoldi di un tic di frescure vie pe Istât.
ALESSIO POTOCCO

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +