TERITORI – A àn votât in Carinzie e a Salisburc

Mancul 10% in Carinzie, mancul 6% a Salisburc: il partît dal cancelîr Werner Faymann (SPÖ) al è tombolât par tiere, cuintri ducj i sondaçs. Lis analisis daspò des votazions a fevelin di une migrazion dal nucli de clientele eletorâl dal partît: i lavoradôrs a passin a trops in direzion de diestre, in part ancje viers la diestre estreme. Pe prime volte, si sintin lis vôs critichis tal front dal consens par Faymann.
«Lis balotazions in Carinzie e a Salisburc a àn mostrât che cuant che e je crisi economiche la int e à miôr il cjamp diestri che no il cjamp sociâl.» Un fat che si à za ripetût te storie austriache, se si impensin dome dai svilups tai agns Trente dal secul passât.
La pôre di pierdi il puest di vore e cîr messaçs clârs ; tal câs de SPÖ e mancje une linie limpide: no je vonde palese, par esempli, la posizion te cuistion impuartantone dai stranîrs.
Il fatôr Haider al è stât decisîf
Chel che al à pierdût aes balotazions al à non Reinhart Rohr, il prin om de SPÖ carinziane. Sù par jù il  37 % dai intervistâts al veve strolegât une disfide a cjâf a cjâf cul sucessôr di Haider.
Al à cjapât il 28,74% (38,43% tal 2004). «Chest no sal spietavin» – al à dite Rohr -. A jerin „irazionalitâts». Ven a stâi, Haider muart. «Evident che il fatôr Haider al è stât decisîf».
Il partît metût sù di Haider 4 agns indaûr daspò di un slambrament dal «so» ex Fpoe (liberâl nazionâi), al à cjapât il 44,89% dai vôts. L’innomenât setemanâl politic Spiegel al dopre lis peraulis: «Balotazion in memorie di Jörg-Haider» o «Sant Haider». Sant Haider, parcè che i rezidôrs dal BZÖ a àn cirût di metisi ben in pose, tignint simpri un ritrat di Haider tes mans.
La Carinzie e je un câs speciâl. La Aleance BZÖ e je deventade il partît de Carinzie. Chest concet al à funzionât, a disin i comentadôrs.
I carinzians i àn regalât ae memorie chest risultât straordenari. Une vincite des emozions ancjemò frescjis, dome cuatri mês daspò de muart dal «Pari dal paîs» Haider, defont intun incident dramatic la gnot jenfri i 10 e i 11 di Otubar.
Ae fin, a àn tirât dongje ancjemò di plui dal stes Haider tal 2004 (42,4%).
Te sede de ÖVP al è tornât il bonumôr; di front dal «biel risultât» (16,83% in Carinzie), a Salisburc ducj i doi i grancj partners a nivel federâl a àn pierdût. I Verts, al ultin moment a rivin a cualificâsi cul 5,15 %, in gracie dai risultâts des schedis eletorâls (il vôt par pueste), pal acès al parlament regjonâl a Clanfurt.
La strategjie dal FPOE di profetizâ la fin de Aleance di Haider e je lade mâl: si è cjatât cun dome il 3,76% dai vôts, vâl a dî disot de baridure dal 4%, e duncje al è fûr dal parlament. Une sconfite clare se si impensin che il FPÖ al declarave za muart il BZÖ cence Haider.
Dai risultâts di chestis balotazions al dipendeve pardabon il destin dal partît di Haider, une disfate e sarès stade di sigûr la fin de Aleance pal futûr e une fusion inevitabile cul concorint diret FPÖ.
Janez Erat