SPECIÂL – Fausto Schiavi, l’ultin leader politic

Al baste dâ une cjalade ogni volte che in Friûl si va a votâ: autonomiscj di ogni bande, simbui di ogni colôr, dividûts e sparniçâts par ogni cjanton, ognidun a coltâ il so piçul ort impen di lavorâ insieme par cjapâ i obietîfs che un moviment autonomist al varès di vê, cul risultât finâl di vê poc o nuie e di restâ dispès cuntun pugn di moscjis in man.
CUARANTE AGNS INDAÛR_ Juste il contrari di ce che al sucedeve cuarante agns indaûr, cuant che su la sene politiche furlane al jere presint un personaç come Fausto Schiavi, un om di rare luciditât politiche, dotât di grandis visions, cognossidôr de storie dal Friûl, inamorât de so tiere tant di spindi par jê la proprie vite, convint de pussibilitât di viodi un Friûl furlan e determinât tal rivâ a chest risultât.
Risultât che al à vût, forsi ancje plui di ce che si spietave, ma che al è durât masse pôc, nancje cinc agns,. Si è tratât juste dal timp de sô curte presince te politiche nostrane, dulà che al è passât tant che une stele comete, puartant la lûs e lassant une lungje sdrasse luminose che si pues viodi ancjemò in zornade di vuê.
Jentrât cuasi par câs tal Moviment Friûl inte vierte dal ‘67, Schiavi al à savût cjapâ par man chest grup di autonomiscj, pôc plui di un moviment di opinion, e lu à trasformât intun partît politic, ben organizât e determinât, fin a puartâlu ae vitorie storiche aes elezions regjonâls dal ‘68 cun 3 conseîrs elets.
GRANT ORGANIZADÔR_ Fin in chê volte il MF, nassût tal ‘66, si bateve pe autonomie dal Friûl, al vosave cuintri i partîts tradizionâi che no scoltavin lis richiestis dai furlans, si zontave aes protestis par vê la universitât a Udin, al stampave ancje un mensîl di informazion, ma al jere forsi za rassegnât a un destinat di sconfite che o timp o tart e sarès rivade. Ma Schiavi al à savût organizâ chel moviment di zovins, al à savût fevelâ cu lis peraulis justis, autorevulis e di grande credibilitât, metint dongje e fasint lavorâ in grup lis personis, fasintlis deventâ responsabilis denant dal grant lavôr di frontâ e dividint cun lôr lis grandis vitoriis concuistadis.
Visionari e profetic, cussì si podarès definîlu, stant che lis sôs peraulis di 40 agns indaûr a son ancjemò atuâls in dì di vuê: «Cuant che si fevele de Europe dai Stâts nazionâi si met adun une union impussibil, parcè che e rive de fusion di parts naturalmentri repulsivis. La uniche Europe pussibil e je chê des regjons, par vie che e je fate di Ents che no son antagoniscj, ma costruîts su fondis storichis che a rispuindin aes esigjencis dai singui popui. Al è intune Europe cussì che il Friûl, regjon naturâl e storiche, al podarà vê la sô juste colocazion».
E al è stât ancje il prin conseîr regjonâl a fevelâ par furlan dentri de aule dal consei.
CUINTRI I ORDINS DI ROME_ Schiavi nol jere cuintri la Italie ma al jere cuintri i partîts politics talians, e cuintri i politics furlans che a cjapavin ordins di Rome impen di scoltâ la vôs de proprie int. Lui si insumiave une gjenerazion di aministradôrs furlans par direzi la nestre regjon, par gjavâ almancul une part di paronance ae Triest filoromane, par ecuilibrâle tai confronts di Udin capitâl storiche al centri dal Friûl; al domandave lis autostradis Udin-Tarvis e Palme-Gurize par dâ un svilup economic za tai agns Sessante e par tornâ a meti in pîts la economie e la vite sociâl de nestre tiere. Robis che, ditis 40 agns indaûr, par cualchidun a sunavin come «eresiis» ma che vuê ae lungje a àn dât reson a Schiavi, ai siei amîs e al lôr lavôr.
Un om che al à savût dâ fuarce a une biele idee e fâle deventâ une grande realtât, un om che al è mancjât masse adore e che al coventarès ancje cumò.
LUCA ZORATTI