Il Maritain triestin al vâl plui dal Menocchio furlan

Metêt dongje chestis dôs gnovis. L’istitût Jacques Maritain di Triest al à cjapât de Regjon 145mil euros tal 2009, 110mil tal 2010, compagn tal 2011 e tal 2012, 55mil tal 2013 pes sôs ativitâts. Ce fasial di tant impuartant? Cunvignis e seminaris su la pâs, i dirits umans in Europe e vie indenant. Ma soredut, cheste la seconde gnove, al è colegât ae Associazion 360, une fondazion di Enrico Letta. Il segretari di 360 al è il senatôr triestin dal Pd Francesco Russo, che al è ancje il fondadôr dal Maritain triestin.
A fasin in dut 538mil euros in 5 agns par un “organisim culturâl ricognossût di interès regjonâl”.
Ma ce colpe àno alore il circul Menocchio o l’Ent teatrâl furlan, o lis fameis che a vuelin fa studiâ il furlan a scuele se no dome chê di no vê cualchi sant in paradis, scusait, in parlament, se si viodin cui finanziaments a zero.
Cualchidun al è simpri pront a ribaltâ la cuistion: «ma dute la culture – a disin – e je impuartante» Cui dîs di no, ma àn di spiegâmi parcè che chê furlane e je simpri di serie B.
Ma soredut a àn di sclarî a ducj che pe Regjon e ven prime une setemane di “Antropologjie Aplicade”, naturalmentri a Triest, che no un lavôr di agns in Val Ciline o ator pes salis teatrâls dai paîs furlans o tes aulis des nestris scuelis. ❚
✒ L’om di Buri