Sfuei Mensîl Furlan Indipendent
Archivi de Patrie

SPECIÂL 3 DI AVRÎL. Aiar di restaurazion sul complean dal Friûl

............

La moderne societât de informazion e petene vie la memorie: no si visisi plui di ce che a domandavin lis manifestazions pe universitât dal Friûl di 40 agns indaûr, figurìnsi il 3 di Avrîl dal 1077.
“Vonde cu lis fotis de no concorence cun Triest”, al diseve il professôr Tarcisio Petracco, “il Friûl al à dirit a une universitât vere, vadì concorenziâl”. “O stimi che al convegni cooperâ ducj”, e declare te scree dal an academic la presidente de Regjon Debora Serracchiani, “plui che lâ indenant a competi tra di nô”. “Ce coventino tancj centris di ricercje intune regjon tant piçule? – al diseve timp indaûr un de Area Sience Park di Triest – Vonde un, chest”. Par cumò no lu disin in forme davierte, ma lu pensin in tancj, dentri cheste gnove classe dirigjente, di drete o di çampe che a sedin: “Podìno permetisi tancj ospedâi, tancj teatris, tancj conservatoris, tancj museus?”. Figurìnsi po il furlan: “Parcè straçâ bêçs par tignî vive une lenghe che e je in dut câs destinade a murî?”

La presidente de Regjon Debora Serracchiani
La presidente de Regjon Debora Serracchiani

A son dome i ultins segnâi di une rive jù centralistiche, sclopade sì cu la crisi economiche, ma che e ven di plui lontan. Cemût si fasial a guviernâ un mont che al è simpri plui complès e che al cor simpri plui svelt? Semplificant e decidint. E dulà si puedie ridusi al sempliç la complessitât e decidi besvelt? Al centri, no mo.
Sierìn lis provinciis, alore, lis regjons, din dongje i comuns masse piçui. Cui varessial di fâ ce che provinciis, regjons, comuns a àn fat fin cumò? Il stât, no mo, ministeris, prefets, comissaris. Dut plui sempliç, dut plui a bon presit, dut plui svelt. Mancul democratic? Un presit che in timps di crisi o scugnìn paiâ.
A tornin fûr ideis che si pensave sepulidis. O vin sbaliât a pensâ che “piçul al è biel”. Cumò al è biel il grant. Daûr dal retôr de Universitât dal Friûl Felice De Toni, dal model di sisteme universitari imbastît de politiche taliane e salte fûr une “derive neofordiste”: dome lis grandis universitâts a varan didatiche e ricercje, chês piçulis a scugnaran contentâsi di dâ lis laureis trienâls.
La çampe e torne parsore des sôs decisions di cualchi an indaûr: la riforme dal titul cuint de Costituzion, si dîs, e da masse podês aes regjons, al covente un ridimensionament. In ce cjamps? Par esempli, in chel de energjie e dal turisim che a àn di tornâ al stât.
E pûr, nol è stât il centralisim a fânus fâ une ricostruzion che ducj a declarin esemplâr. E je stade la gjestion de bande di Regjon e Comuns, al è stât il control de bande de int. In struc, la autonomie. Lait a viodi ce che al à cumbinât il stât in Sicilie tal Belice, o, par restâ plui dongje tal timp, a L’Aquila.
E nol è stât il centralisim a fâ deventâ la nestre universitât une des miôr in Italie in rapuart aes sôs dimensions: e je stade la sô autonomie. La concorence, impen di jessi un mâl, i à dât un sburt decisîf no dome ae sô cressite, ma ancje a chê di Triest.
Nol è vêr che la miôr ricercje si fasedi intes struturis plui grandis. Il secuenziament dal gjenome de vît – prins tal mont – lu àn fat tal pôl tecnologjic di Udin: ce àno fat di memorabil te plui grande e tant plui finanziade Area Science Park di Triest? Se “grant al è biel”, cemût mai – come che al ricuardave il retôr De Toni “lis dîs miôr universitâts dal mont – tant che Harvard, Stanford, Oxford, Cambridge, Berkeley, MIT – àno un numar di students pari a 16mil, come Udin”?
No je vere che tal mont di vuê progrès e inovazion a vignedin des grandis fabrichis, des grandis universitâts, dai grancj ospedâi: a vegnin di grandis rêts fatis di grups di piçulis e mediis dimensions. L’avignî al poie suntune vision reticolâr, la uniche che e rive a tignî dongje la complessitât dal mont. Il centralisim che al fasarès dut plui sempliç, al è dome la ilusion di chei che a cjaminin cul cjâf voltât par daûr. ❚
Mauro Tosoni

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +