La vergogne des latariis

Sîscent firmis intune dì, par fâ restâ in Friûl un patrimoni che al nudrìs lis nestris lidrîs: il lat. La storie e je chê di une siore di Udin, Paola Pino Vianello, che si è metude a tirâ sù adesions a une petizion par tignî achì di nô la proprietât e il control di Latterie Friulane. Ma no parcè che e vedi cualchi interès personâl concret: no je parone di vacjis, no fâs part di nissune associazion di agricultôrs e nancje di nissun sindicât. No je part di nissune associazion di consumadôrs e di nissun partît politic. E je furlane: e vonde. E par chest si è mote.
Al è cetant strani in dì di vuê cjatâ int che si bat in maniere disinteressade par ideis che a somein fûr dal timp e de logjiche di un marcjât che nol à regulis e che nol cjale in muse a di nissun. Ma la siore Paola e saveve che Latterie Friulane al jere un dai ultins tocs di Friûl che ancjemò no jerin svolâts vie, glotûts de brame simpri penze des multinazionâls o svendûts par un blanc e un neri di furlans masse atents aes palanchis e pôc ae lôr identitât. E cussì, a 79 agns, cuant che altris si gjoldin cuiets la lôr meretade pension, la siorute e à vude une idee che e à stiçât une vore di interès di bande de int. A àn firmât ducj: zovins e vecjos, operaris e disocupâts, golets blancs e implegâts: e no dome tai dîs che la siorute e steve di fûr de Galarie Bardelli. Ancje tes zornadis dopo Paola, adun cu lis dôs fîs Mariolina e Valeria, e continuave a ricevi solecitazions par puartâ indevant la sô bataie. E no jere plui di bessole. Di ogni bande dal Friûl, ancje di Gurize, dulà che Latterie Friulane nol è che e vedi po ducj chei afârs, a rivavin richiestis di vê i modui par cjapâ sù lis adesions e la ruede de petizion no si fermave.
Tal non de gjenuinitât di un prodot “san e furlan”, in chest document che si proponeve di firmâ si clamave ae mobilitazion i citadins che, cuntune semplice sotscrizion, a podevin pandi dute la lôr voie di dî “no” al lat forest. Parcè che l’efiet di une tratative come chê cu la Granarolo, gruesse aziende emiliane che e veve za metût lis mans su la societât di Cjampfuarmit, e varès vût un impat une vore pesant suntun compart che al à bielzà paiât i coscj de inchieste su la Cospalat (a proposit, di chê vicende no si è savût plui nuie: trop timp coventaraial par cognossi la veretât?). La pueste in zûc e jere penze: la pierdite complete de filiere di un aliment che al è un pôc ce che e je la marilenghe in ambit inteletuâl. La mari di fat e covente a dâ dôs robis ai siei fîs: il lat par nudrîju e la lenghe par fâju deventâ oms jenfri altris oms.
La storie de siore Paola e di ducj chei che le pensin come jê e je une vore biele, di chês che a meritin di jessi contadis: int par ben che pardabon e pense che la bontât di un prodot e rapresente un valôr pal teritori e che e à vût voie di scombati par chest. Ae mail paola.pinovianello@gmail.com a son rivadis adesions a sbreghebalon. Ma alore parcè cheste storie le contìno al passât?
La rispueste le savês bielzà in tancj… parcè che Latterie Friulane ae fin e je stade vendude. I furlans che a jerin socis a àn vût dome voie di vuadagnâ ce che ur jere stât imprometût e a àn sielzût di tirâ sù cualchi franc invezit di fidâsi dal plan che la Coldiretti e veve prontât par tignî in Friûl lis brenis de societât. Robis di no crodi par chei che a àn un concet di Friûl come sisteme integrât di teritori, int e economie. Ma a son robis che a son zaromai sucedudis (par esempli cu lis bancjis) e che duncje nus mostrin che il furlan salt, onest e lavoradôr in dì di vuê al à gole dome di bêçs. De furlanetât ur interesse a pôcs. Pôcs, ma bogns: come Paola, come il president di Coldiretti Dario Ermacora e ducj chei che come lôr a àn cirût di resisti ae potence dai bêçs. Dulà che un popul si free lis mans dant vie la sô tiere e ce che e à di bon (come il lat), dant vie la sô lenghe par braùre di une modernitât che e fâs someâ la omologazion la uniche clâf pussibil, e reste nome une frase di podê dî: “Not in my name”, “no intal gno non”. Covente jessi in tancj a dîlu, e no rindisi al fat che nus somee di jessi bessôi. Paola e dimostre che o sin plui di ce che o pensìn. ❚
✒ Walter Tomada