MateâriuM, belanç de prime rassegne di autôrs di teatri

Nissun ancjemò al veve pensât di meti adun, intune rassegne di incuintris, i nestris autôrs di teatri come intun catalic. Lu à fat il MateâriuM, vâl a dî il laboratori di gnovis dramaturgjis e il cjistiel di Borc (ven a stâi, Sant Pieri di Ruvigne, ndr) si è jemplât par un mês e mieç di int interessade a capî cemût che e nas une dramaturgjie, ma soredut cemût che al nas un dramaturc (e se o vin di zontâ alc par complicâ lis robis: cemût che al nas un dramaturc furlan).
Une piçule parentesi: il 30 di lui ai Avostanis Angelo Floramo al à presentât cuatri esemplis di int che e à fat une sielte di vite lant daûr a la sô passion e sielzint voris non tant a scuare cu la tindince gjenerâl. Si fevele di int che si è metude a lavorâ la tiere a Drentus (in bande di Dordole) o che e fâs il boscadôr a Paulâr, o pûr di un che al fâs di mistîr l’esploradôr dal Artic o, in ultin – atenzion a la peraule magjiche -, a doi zovins che a àn viert une librarie (e cumò si butin intun cafè leterari)! Si disarà che la crisi e sburte il mont a inventâsi di dut: fintremai chê di vendi libris che, te societât in dì di vuê, e podarès someâ a une ativitât sul stamp di cui che al volès lâ a vendi cigars a Fidel Castro o sorbets ai pinguins.
Discuvierzi alore, tornìn al MateâriuM, che cetante int e rive a vivi di teatri nus somee un miracul. E cheste e sarès dome la impression che e i ven daûr al prin pinsîr: ma no podevino fâ alc altri? Alc di tirâ dongje cuatri palanchis par cambiâ la machine o vierzi un mutui pe cjase. Insumis, si varà di fâ lavorâ ancje i bancjaris, i muradôrs e chei che a vendin machinis? Ce fasial un furlan la domenie a buinore, stant che aromai nol va plui a messe? O che si met a regolâ il prât cu la sô machinute di seâ o che al lave la machine! Dute la nestre societât, cui siei valôrs, e riscjie di jessi savoltade se dute la int si bute in culture.
Baste dâi un cuc a lis classifichis dai bêçs metûts tal 2011 pe culture in Italie (32im puest, no ‘nd è nissun daûr) o pe istruzion (31im, o vin fat miôr de Grecie) par capî che culì si batin i dincj su la gratule (Font: Ansa-Centimetri pal mieç di Economia Etica).
E pûr si cjate int che e pense di meti sù famee lavorant cu la culture! Par dîle dute, pensait che ancje la rassegne di incuintris tal cjistiel di Borc – vâl a dî disesiet seradis cuntune medie di presincis di plui di vincj personis – e je costade vueli di comedon e tante passion. A dimostrazion che cuant che la idee e je buine no coventin tancj bêçs par impastanâle. Alore cumò si capìs parcè che par sapontâ acjadiments o iniziativis che no valin nuie si cjatin simpri i bêçs: parcè che chês di valôr a nassin di spontani, a cressin in graciis de passion di cualchidun, a vincin no pai bêçs ma parcè che une buine idee e à une sô fuarce intrinsiche.  Capît? Bisugne fâ il superflui par tirâ dongje un franc.
A mi mi somee che un paîs che nol capîs che meti bêçs intun semenzâl nus puartarà risorsis un doman, al à pôc ce insegnâ a chei altris. Si fevele simpri plui dispès che la zoventût in dì di vuê no je come chê di une volte, e pûr lis ideis plui inovativis jo lis ai cjatadis (come simpri, nol è gambiât nuie) tra i zovins. O chei dal Homepage sono carampans? O dute la compagnie di Reddarmy ise saltade fûr di un ricovar regjonâl? E ce si aial di pensâ di chel amì di gno fi che, laureât in psicologjie dal lavôr, al à pensât ben di butâsi te ristorazion e fâ deventâ il so ambient un centri di riferiment culturâl? Mats, dal sigûr. O forescj.
E un pôc forescj a son ancje i doi fondadôrs dal MateâriuM, vâl a dî Alessandro Di Pauli e Anna Gubiani. Sì, va ben, a son di Sant Denêl, plui furlans di cussì. Ma Alessandro al è stât a Barcelone no sai trops agns, dulà che al à scrit e fat esperience te Sala Beckett, obrador internacional de dramatúrgia, e Anna e lavore ancjemò in Gjermanie tant che dramaturg. Ma la passion, e il convinciment che si puedi fâ e lavorâ te culture ancje in Friûl, ju à sburtâts a imbastî il MateâriuM.
Bêçs pôcs, si diseve (malistent di cuvierzi lis spesis, forsit), fadie tante. E soredut maravee. Prime di dut di chei che a jerin stâts clamâts a contâ la lôr esperience (e a jerin tancj: Paolo Patui, Giuliana Musso, Paolo Sartori, Sarah Chiarcos, Carlo Tolazzi, Eva Geatti, Andrea Collavino Giorgio Monte, Manuel Buttus, Claudio Moretti, Fabiano Fantini, Elvio Scruzzi…) e dopo di chei che a jerin stâts clamâts a spiegâ il lavôr dai prins: cemût tante int che si interesse di noaltris? Nissune maravee invezit tra chei che a àn partecipât ai incuintris: zovins atôrs o che i plasarès fâ l’atôr, regjiscj o che i plasarès tentâ, scritôrs dispatussâts o in deventâ, curiôs, cetancj curiôs. Ma ducj cuntune fisse tal cjâf: cence la culture, cence il teatri, cence i libris, cence alc che nus dedi la misure de nature dal om, nol esistarà plui l’om.
Une robe si podeve intravignîle cjalantsi ator te sale dal cjistiel di San Pieri: di chês voltis il rapuart al jere paritari. Vâl a dî che dispès tra i partecipants si cjatave un contribût a lis discussions che al trasformave l’incuintri intun scambi di esperiencis e intun stimul che al sburtave viers di un aprofondiment. Nissun al è mai tornât a cjase cu lis sachetis vueidis. Nancje i autôrs clamâts a contâ la lôr esperience.
La rassegne dal MateâriuM e à mostrât un ambient culturâl vivarôs e in spiete di rispuestis dal nestri mont politic. Al è par chel che o soi tornât a scrivi dal laboratori di gnovis dramaturgjis di Ruvigne. ❚
Franco Marchetta