Sfuei Mensîl Furlan Indipendent
Archivi de Patrie

SIMPRI BOGNS. Alviero Negro, Strumîrs e zambarlàns, Udin, 1978

............

“-Alò, alore! Disèimi dut, ma ae svelte, ch’o spieti i siôrs des Vilis di chenti ch’a son stâz convocâz culì par cheste sere-
-Eco za, siôr Dean: ‘e je in pîs ancjemò la quistion cu la int di Morsàn di Strade. ‘E àn vindût, senze vê il consens, chel ch’e àn boscât in tai nestris boscs…”
Al è il prin dialic dal drame storic in dôs parts scrit di Alviero Negro e che al à vinçût, intal 1977, il prin premi des oparis al concors di teatri bandît de Societât Filologjiche Furlane.
La vicende si davuelç intal 1509 e il contest al è chel de lote jenfri Vignesie e l’Imperi, cu lis dôs fazions che si jerin vignudis a creâ in Friûl, i çambarlans che a tignivin par Vignesie e i strumîrs che a jerin a pro de Austrie. Contrascj tant pençs di rivâ adore parfin a sbregâ amiciziis e fameis, se mai al fos sucedût, par esempli, che une fie si inamoràs di un de fazion contrarie.
La ambientazion storiche e je rigorose e no mancjin riferiments a cuistions altris rispiet al teme principâl, come cuant che il nobil Savorgnan al tocje il discors de Inquisizion, no cence osservâ che a Vignesie “no à masse slaz”. Notazion storichementri precise (Vignesie e jere tolerante…), che però e introdûs ancjemò un element incuietant, une menace che e je li, magari indurmidide, ma li.
Un drame torgul e violent, dulà che si intuìs subit che la tragjedie e je pronte a discjadenâsi, che e baste une faliscje par fâ vignî fûr dute la cagnetât, dutis lis cualitâts piês dal om. Ducj i personaçs a son presonîrs dai rûi che ur son assegnâts e no rivin a saltânt fûr. E cussì a finissin par sacrificâ ancje i afiets plui biei, dal moment che il sens di umanitât al ven metût in bande. Dome Cunizze, straordenarie figure di femine dal popul, e mostre di vê capît l’essenziâl des robis: “Ma indulà àno la fuarze i puars di tradîus vualtris? A tradîsi tra di lôr, chel sì, a’ son pronz, che ur al vês insegnât vualtris!” E ancjemò: “ (la vuere) mi pareve che e fos tant lontane di chenti (…) e invezit le vin dentri di nô…come une rabie salvadie, piês de peste, un cancar che nus mangje il cûr”.
Cunizze che e je ancje protagoniste di un dialic cul so om Jop e po cui coparis Femie e Dreàn, di un realisim crût, vivarôs e ancje lubric, che al fâs pensâ al Ruzante pe intensitât e l’estri des replichis.
Al displâs propit che chest drame al sedi pôc rapresentât e pôc cognossût, tant di mancul di chel che al mertarès.
✒ Laurin Zuan Nardin

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +