Sfuei Mensîl Furlan Indipendent
Archivi de Patrie

Nascimbeni al vinç il premi “Zâl par furlan

............

Il scritôr e poete udinês Adriano Nascimbeni cu la conte “Muart in lagune “al à vinçût la cuarte edizion dal premi leterari “Zâl par furlan” inmaneât dal Comun di Spilimberc dutun cuntun trop di manifestazions nomenât “Voe di identitât” e metût su in ocasion de fieste de Patrie dal Friûl.
La jurie (President Piero Villotta components Maria Carminati, Paolo Cossi, Maurizio Driol, Massimo Duca, Patrizia Leonarduzzi e Giuseppe Mariuz) e à cussì mutivât la sielte di dâ il prin premi a “Muart in lagune”:
“trame interessante, crete, non banâl che e lasse vierte une pluralitât di ipotesis. I personaçs a son ben deliniâts. L’ambient furlan al è rapresentât in maniere valide. Il lengaç di espressivitât sute al è vivarôs dal pont di viste lessicâl intal rispiet de grafie uficiâl.”
Il test di “Muart in lagune” al è stât let dal atôr Claudio Moretti cun tecniche rafinade e tant cûr.
Il secont premi al è stât dât a Paolo Venti di Travesio par la conte “La storie dal gno paron Danel Cernazai”
Il tierç premi lu à mertât Elena Ferro di Flaiban cu la conte “L’amôr al free”.
Une menzon speciâl ancje par Fedora D’Angelo (Miôr un grignel di pevar che un fi di mus).
Inte sezion “Fumuts” invezit al è stât assegnât dome il secont premi, a  Matteo Storti, autôr di “Arma Christi”.
La cerimonie di premiazion e je stade sabide ai 23 di Març aes sîs sotsere presint il Sindic Francesconi e altris Autoritâts e tante int.
Adriano Nascimbeni, avocat udinês da pôc in pension e fin chê altre dì Difensôr Civic tal cjâf lûc furlan, nol è gnûf a chescj ricognossiments.
Tal 2010 cul romanç “Jo e Luzie. Un delit di paîs” publicât de Cjase Editorie Forum, al à vinçût il Premi San Simon a Codroip. Tal 2012 cu la poesie “Pinsîrs” al à mertât il Premi Gjso Fior a Verzegnis.
Nascimbeni al scrîf ancje par talian tal 2008 al à publicât “Ricordi di un socialista friulano (di quarta fila)” e tal 2009 il libri di poesiis intitulât “Il volto della luna” ducj doi cu la Cjase Editorie Leonardo di Pasian di Prât.
✒ Redazion

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +