Sfuei Mensîl Furlan Indipendent
Archivi de Patrie

CJAMINANT TE STORIE. L’insediament fortificât dal “Cuel des Maseriis”

............

Chest an o vin volût vierzi une gnove rubriche par presentâ dutis chês realtâts archeologjichis dal Friûl che, magari cussì no, a son mancul cognossudis ma no par chest mancul impuartantis. Par fâ chest o vin domandât la colaborazion de Societât Furlane di Archeologjie che dal 1989 si impegne cetant su dut il teritori par valorizâ e promovi il nestri patrimoni culturâl.
L’insediament fortificât dal “Cuel des Maseriis”
Chel di Verzegnis al è un dai sîts plui interessants de archeologjie de Cjargne, indagât par cetancj agns e inmò in dì di vuê ogjet di studi par cure de sezion cjargnele de Societât Furlane di Archeologjie. Il sît al è sul Cuel Mazeit, logât tra lis frazions di Vile e Chiaulis, e al derive il so toponim di “maseriis”. La localitât e cjale a nord la Val de Bût e a sud la Val d’Arzin e par chest motîf intune posizion strategjiche tal sisteme di fortificazions a difese dai valics dal arc des Alps orientâls.
Tacâts te fin dai agns ’80 i sgjâfs a àn rivelât di fat un insediament fortificât cun diviersis fasis di frecuentazion che a van dal Eneolitic (3000 cirche prin di Crist) fin ae Alte Ete di Mieç.
Sul cuel si puedin viodi une cinte fortificade e cualchi ambient des variis epochis. In particolâr, come che a confermin i studis de archeolighe Gloria Vannacci Lunazzi, la tor che e je parsore dal abitât, di forme cuasi cuadrade cuntune superficie interne di cirche 35 metris cuadris, e je stade indagade fin tun strât profont cun segns di combustion dopo di un incendi che al à sdrumât l’edifici; chest al à permetût di individuâ il periodi dal event tor il 1150 e il 1270 dopo di Crist grazie al metodi dal radiocarboni. Cheste tecniche e à cjapât in esam diviers reperts che a vignivin dal strât brusât e e à permetût di confrontâju cun reperts di altris insediaments fortificâts de Cjargne come Divilin, Dieç, Raviei e Cesclans.
Dilunc dai sgjâfs dai agns 2004/2005 si è scuviert che la tor e je stade fate sù o ristruturade tal VI secul dopo di Crist (forsit in epoche bizantine) parsore di altris realtâts plui vieris. Sot di fat al è vignût in lûs un mûr dal IV secul compatibil cun altris costruzions di epoche romane imperiâl individuadis tal insediament su la plane dongje de tor. Un altri aprofondiment stratigrafic sot dal mûr al à permetût di verificâ la presince di ceramiche protostoriche. Cheste fase plui antighe e je stade indagade plui a font dilunc dai sgjâfs dai agns 2000-2008 che a àn mostrât la presince di un insediament cuntun mûr in piere e reperts che si datin tra il 3600 prin di Crist e il IV secul dopo di Crist. Chest sît abitât al somearès sedi stât doprât ancje in te Alte Ete di Mieç come che e à dimostrât la scuvierte di une tombe di femine compagnade di une furnidure cun rincjins in bronç riferîts a une culture paleoslave tra i secui VII e XI.
Altris sgjâfs dilunc des muris dal insediament a àn stabilît la frecuentazion umane dal periodi Neolitic cun reperts di siliç sclesade, de ete dal Bronç cu la presince di ceramichis, bronçs e cuars di cierf e de ete dal Fier fin al periodi celtic e roman.
✒ Venusia Dominici e Giovanni Filippo Rosset
In colaborazion cu la Societât Furlane di Archeologjie, Par informazions: Societât Furlane di Archeologjie, Puarte Vilalte, vie Micesio 2, Udin. Tel. 0432 26560. www.archeofriuli.it

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +