ATUALITÂT – A Sedean viert l’archivi di Tessitori

Sabide ai 7 di Fevrâr, li de biblioteche di Sedean, al è stât screât l’archivi dal pari de regjon Friûl Vignesie Julie, il senatôr Tiziano Tessitori. Il materiâl, metût a disposizion in gracie de decision tal 2003 de famee Tessitori di dâi dut al comun, al è disponibil al public tai oraris che e je vierte la  biblioteche. L’archivi, che di chi a pôc al sarà acessibil ancje sul sît internet dal comun di Sedean e su chel dal Senât di Rome midiant dal progjet che al vûl tirâ dongje i patrimonis documentâi di ducj i senatôrs, al cjape dentri 3.840 volums di leterature, di storie, di dirit, di siencis e di tutele de lenghe furlane. Cun di plui, si cjatin uns 240 fassicui di cjartis che a àn a ce fâ cu la ativitât politiche, professionâl e familiâr di un dai paris de autonomie furlane; a dut chest bisugne zontâ desenis e desenis di siei articui publicâts su plusôrs periodics.
Il lavôr di ordenament dal enormi archivi lassât di Tessitori, compit dât in man ae Universitât dal Friûl di bande dal stes Senât, al è stât puartât insom daspò un an, dant cussì a ducj i Furlans – e no dome – la pussibilitât di podê cognossi miôr la figure di Tiziano Tessitori e la ereditât politiche e ideologjiche che nus à lassade. Dopo vêi dedicât une place e un bust tal 1995, juste in ocasion dai cent agns de sô nassite, cun cheste iniziative la aministrazion di Sedean e à fat un altri pas impuartant par memoreâ un dai siei fîs plui innomenâts.
A jerin presints te ocasion de scree dai prins di Fevrâr i senatôrs Ferruccio Saro e Flavio Pertoldi, il president de Regjon Renzo Tondo e il president de Provincie di Udin Pietro Fontanini.
REDAZION