CJARGNE. Darte gnove gjestion des termis

Tra pôcs dîs, di precîs ai 15 di Avrîl, a tornaran a vierzi lis Termis; la gjestion, par 18 agns, e je stade dade ae ‘Casa di cura città di Udine’, la societât che à vinçût il bant. “E je stade une imprese dificile – al dîs il sindic Marlino Peresson – ma o sin contents dal risultât. La societât nus è parude in stât di dâ garanziis par servizis di cualitât alte e di resonâ su prospetivis di svilup autentichis.
La sielte dal periodi lunc e da la pussibilitât al gjestôr di invistî no dome di cjâf ma ancje cun capitâl so; invistiment che tal lunc periodi al podarà amortizâsi e dâ beneficis, e tal stes timp permeti ancje ai privâts (soredut ai gjestôrs di albiercs) di invistî a lôr volte.
In chescj agns pustiçs, la Aministrazion e à vût un grant disasi economic; o vin metût cirche 200 mil euros ad an te gjestion des termis, bêçs gjavâts aes za sclagnis risorsis a disposizion dal comun par lavôrs di manutenzion, pal miorament dal tiessût urban, pes esigjencis des frazions. O vûl dî: se chescj agns achì no sin rivâts a fâ manutenzion urbane, come che la int si spietave, al è ancje parcè che no nus rivavin i contribûts, e la disponibilitât de aministrazion e jere scjarse.
Tal prin periodi nol è che o larìn a recuperâ tant: il fit al rivarà a 150 mil euros ad an, partint chest an di 50 mil. A restin di competence dal comun i intervents straordenaris.
Cun fonts in buine part europeans, o completarìn il palaç des aghis cun gnûfs servizis (bagn turc, saune, e v.i., in plui de opere di coibentazion de struture).
Fintremai a vuê, lis termis a son stadis su pe schene dal comun, cun cualchi aiût de Regjon, de Comunitât di mont e de Provincie. O crôt che cumò si puedi cambiâ pas. La regjon, seontri me, in chescj ultins agns no veve ben definît il cuadri strategjic di chest gjenar di turisim, in mût particolâr de Cjargne. Mi soi lamentât ancje cui sindics de valade che no àn spindude nancje une peraule a pro des termis; ducj pronts a lâ a tirâ la gjachete ai assessôrs par lâ a domandâ i contribûts par lôr cont… O crôt che Darte e sedi centrâl pe economie di dute la nestre zone.”
Lis termis, se a funzionin, a puedin tirâ la economie no dome di Darte, ma ancje des realtâts dongje; par intant si spere che la viertidure e zovi a tornâ a inviâ il lavôr tes struturis alberghieris dal paîs.
✒ Marta Vezzi