Tancj dai miôr artiscj de musiche jazz e contemporanie a àn regjistrât in Friûl, in gracie de esperience inovative di Stefano Amerio
Doi agns fa a son stâts i vincjecinc agns de etichete, chest an a son i trente agns de fondazion dal studi di regjistrazion Artesuono, il lûc privilegjât des regjistrazions musicâls acustichis dal Friûl, de Italie e ancje di Paîs forescj. No si esagjere, al è dut vêr e al baste lâ intal sît internet par lei dut il storic e lis novitâts di cheste realtât ecelente che e si cjate a Cjavalì, ideade, realizade e puartade indevant cun grande passion e maestrie di Stefano Amerio, inzegnîr dal sun cu lis orelis di aur e un grant amôr pe sô tiere. Di fat, nol à mai pensât di trasferî la sô ativitât intai grancj lûcs de produzion musicâl, che in Italie a son par prins Milan e Rome. Al contrari, il so pinsîr al è simpri stât chest, come che nus conte: «Parcè mai musiciscj di chenti scuegnino lâ lontan par regjistrâ in maniere professionâl la lôr musiche? E inmò, parcè mai no pensâ che ancje i forescj a puedin vignî ca par imortalâ i lôr lavôrs musicâi? E je stade une scomesse, scomençade tal 1990, tacade tal garage di cjase cun cuatri imprescj, ma cun tante passion e voie di imparâ.» Nol jere l’unic in Friûl a tirâ sù un studi di regjistrazion, e jere cualchi realtât simil bielzà sul finî dai agns Setante, se no prime, ma Stefano Amerio al voleve menâ lis sôs competencis, nassudis a partî dai agns Otante, in chê nicje musicâl de acustiche, de musiche improvisade, dal jazz, de contemporanie. Un mont pôc cognossût chê volte, o risiervât a pôcs, che lui al à savût, e al sa benon, pandi ator pal mont. No si contin i artiscj internazionâi di dute Europe, des Americhis, dal Gjapon, di ducj i continents che e vegnin a Cjavalì, in vie Mulin Gnûf, par regjistrâ i lôr albums: Fresu, Bollani, Sosa, Taylor, Blay, Winstone, Konitz, Garland… la liste e je cetant lungje. «O ai tacât ancje jo studiant musiche» nus conte Stefano. «O levi a lezion di pianoforte di Glauco Venier che al jere ancje lui un zovin student plen di siums e tante voie di fâ. No ai durât masse, plui o mancul cinc agns, e lis mês passions mi puartavin viers la musiche eletroniche, la dance che in chei agns e leve tantonon. O fasevi basis musicâls pai cjantants che mi domandavin ancje di podê regjistrâ lis lôr vôs. O ai tacât cussì, cuasi par câs, cuntun prin regjistradôr a vot pistis. E daspò e je stade une vere scuvierte di une passion che mi motive cetant ancje cumò, in graciis di une setemane a Londre cu la parochie tal ’86, zovenut. E pensâ che no volevi nancje lâ. Invezit là mi si è viert un mont, e soi tornât a cjase cuntune schirie di rivistis su lis tecnichis di regjistrazion (in Italie al jere impussibil cjatâlis) e tante voie di metimi al lavôr». La grande svolte e je stade tal ’96 cuant che – cu la complicitât di Glauco Venier che al jere daûr a realizâ il so prin disc “L’Insiùm” – al è stât propit Amerio a regjistrâlu, a Cjavalì. A son vignûts daspò altris musiciscj furlans e no dome, tant che Amerio a chel pont al à pensât che al jere vignût il moment di cressi, cuntun grant invistiment par comprâ imprescj di nivel. Un grant sacrifici che lu à ripaiât di tante convinzion e voie di fâ, chê volte come cumò. Tant che chel garage cumò al à il miôr de tecnologjie de audio regjistrazion, e tra l’altri un pianoforte grancode Fazioli che al fâs gole a ducj i pianiscj che dal forest a vegnin ca di lui. «Un altri grant prodot che si realize in Friûl, o condivît ad implen la filosofie di Fazioli». E je une altre grandissime realtât che e met dongje Artesuono e il mont de editorie musicâl, ven a stâi la colaborazion strente cu la etichete mondiâl par antonomasie de musiche jazz e contemporanie – Ecm: Edition of Contemporary Music – che e à sede a Munic in Baviere, etichete discografiche che l’an passât e à festezât 50 agns, direzude di simpri di Manfred Eicher, un santon de musiche. «Al è stât il baterist di Osôf U.T. Gandhi, un altri grant professionist e amì, a inviâmi in cheste esperience che e segne un dai moments plui impuartants de mê cariere. Ancje in chest câs, determinazion e un pocje di fortune. Tant che Gandhi mi à puartât in chest studi nuie altri che Enrico Rava, trombetist che nol à bisugne di presentazions. Achì, là che al à regjistrât tal 2003 “Easy living” par Ecm, Eicher lu à scoltât e i è plasût. Cumò o colabori cun lui in maniere fisse e cuant che no regjistri achì, o voi par lui intai studis plui impuartants di Europe. Al è stât un onôr jessi stât tra i relatôrs invidâts al cincuantesim di cheste etichete mondiâl». Stefano Amerio, che al à di pôc rinovât il studi cun strumentazions de plui alte avanvuardie, al ten a ingraciâ ducj chei che, îr e vuê, a continuin a crodi e a lavorâ insiemi pal “miôr sun regjistrât pussibil”. Lungje vite a Artesuono! ❚
