La Friûlpoint, la dite di «maiutis par furlan dal 1999» e fâs 20 agns, e in cheste ocasion e à screât il sît gnûf e viert i account social Instagram e Facebook (@Friulpoint, ndr).
I prodots Friûlpoint, maiutis ma ancje tancj altris, sedi vistiari sedi gadget, si cjatin in tantis buteghis ator pal Friûl. Nassude l’ultin an dal XX secul, e je une dite familiâr: Michele Venier al è il titulâr, cu la part creative curade di Dree Venier (autôr fra lis altris robis dai Gnognosaurs e di tantis iniziativis in marilenghe). Par celebrâ l’inovâl, duncje, la dite si è dade une biele rinfrescjade inte comunicazion. «La jentrade intal mont social al è un pas che o vin fat par fâsi cognossi di plui» nus conte Michele «o savìn che cuant che un client al rive a cognossinus al presee cetant la nestre produzion e i numars si viodin, ancje li des nestris buteghis clientis. O vin dome il probleme di fâsi viodi ancjemò di plui. Simpri cui invistiments che e pues permetisi une dite che e fâs riferiment a “une nicje di marcjât”, come che si dîs. Che o sperìn si podedi slargjâ simpri di plui, però».
__
La filosofie de Friûlpoint, di fat, e je simpri plui chê di une maiute furlane di autôr cun tindince viers dal progjet di brand di vistiari…
La idee di imprest di divulgazion dal furlan al è simpri il nestri ideâl, chel dai inizis intal 1999. Intai agns o vin intindût di dâi ancjemò plui dignitât cuntun nivel di propueste che si è simpri di plui alçât, an dopo an. Sedi pes stampis, sedi pe cualitât des maiis che cumò o progjetìn ancje te produzion, cun coton di prime cualitât e un fitting dissegnât di pueste. Duncje la linie e je deventade plui fashion tes maiutis e si è slargjade come propueste za di timp. Come vistîts o vin ancje maiutis par feminis, felpis, maiutis par fruts, grumâi, bavarins, cjapiei…
E dopo a son i gadget: cjicaris, magnets, puarteclâfs e vie indevant. Lait a viodi il sît, apont: www.friulpoint.it.
__
Intal sît al è ancje un blog li che no si dan dome notiziis aziendâls, ma indulà che spes o contais il vuestri lavôr.
La smire dal blog e je chê di jentrâ plui in contat cul nestri public, contant ce che o fasìn e di dulà che a vegnin lis nestris maiutis. Ognidune e à la sô storie. O volìn fâ viodi la ricercje, sedi tecniche che culturâl e di costum, che e je daûr di ogni nestre produzion.
__
E je ben presinte ancje la part di e-commerce, un imprest ancje par vendi diretementri…
Il nestri sît al è pensât par vendi, ma ancje par operâ in sinergjie cu lis nestris buteghis clientis: on-line no cjatarês presits plui bas rispiet ai prodots difondûts midiant dai shop Friûlpoint.
No vendìn midiant altris sîts: ni Amazon, e nancje altris.
O crodìn in maniere ferme inte colaborazion cu lis buteghis “fisichis”. La buteghe e da il vantaç di viodi dal vîf i nestris prodots e tastâ (sì, no “testâ”) la cualitât dal coton e des stampis des nestris maiutis. Midiant dal sît si à la pussibilitât di fâ compris se lontans di un shop Friûlpoint o di viodi dulà che si cjate chel plui dongje. Une buteghe che e vûl lavorâ cun nô no patirà mai la “concorence digjitâl”. Friûlpoint al è un brand “deAmazonizât” (al rît ndr).
Intant che mi fevele, Michele al à intor une maiute cu la cifre 1077 fate cuntune biele grafiche. 1077, la date de nassite dal Stât patriarcjâl. «Cheste maiute e pues jessi un esempli dal nestri lavôr. Cumò ancje altris a stan scuvierzint chest numar (mi cimie ironic ndr): o vin vierzude une strade, come che o vin fat tantis voltis, li che dopo in tancj ti vegnin daûr. Par difindisi al covente jessi simpri un pas prime: chest lu fasìn in gracie de smire a volê fâ un progjet di grande cualitât e une passion pe culture e pal popul furlan che o pensi che le vedin pocjis ditis ancje chi in Friûl, magari cussì no». Intant che o cjapi i aponts pe interviste o fâs cori lis imagjins dal sît e cualitât e passion si viodin dutis, come cuant che dut al è scomençât intal 1999: bon lavôr, alore, Michêl! ❚
Redazion
