La cjastine, pome simbul de Sierade, come che e je tradizion, e torne a jessi celebrade a Val di Sufumberc, in comun di Faedis, in graciis de Pro Loco locâl, la plui piçule di Italie. La associazion par trê fins di setemane consecutîfs (6-7, 13-14 e 20-21 di Otubar) e propon di fat la edizion n. 38 de Fieste des cjastinis e de mîl di cjastinâr, manifestazion che e unìs i aspiets gastronomics (a vegnin servidis in medie 10 mil porzions di cjastinis ogni an) a chei de scuvierte dal teritori là che si cjate Val, cognossude ancje cul apelatîf di “terace dal Friûl” pe sô posizion panoramiche. Di fat, a son in program ogni sabide la racuelte gratuite des cjastinis intai boscs de zone (des 2 e mieze dopomisdì, partint de place dal borc) e ogni domenie une cjaminade vuidade (aes 2 dopomisdì, simpri de place dal borc). Tai barachins de aree fiestis a saran ancje dolçs e gjelât aes cjastinis. In plui, garis di orienteering e di mountain bike pai sportîfs, cercis dal Refosc di Faedis e musiche. Il program complet de Fieste si lu pues lei ae direzion www.prolocovalledisoffumbergo.it
Fieste des cjastinis ancje a Tribil Disore, in comun di Stregne, domenie ai 21 di Otubar, cun marcjaduts e musiche, e a Montenârs (6-7 e 12-13-14 di Otubar) cun musiche e cjaminadis tai boscs, cu la pussibilitât di cjapâ sù cjastinis. Di segnalâ domenie ai 14, aes 10 di matine, la cjaminade par rocui e cjastinârs (plui informazions ae direzion www.comune.montenars.ud.it). ❚
