Sfuei Mensîl Furlan Indipendent
Archivi de Patrie

Il puart des fumatis

............

Par noaltris furlans al è strani fevelâ di mâr e di puarts, cuasi che no fossin fîs di Aquilee che e jere un puart pardabon impuartant. E cussì, no si impensìn de impuartance che a àn te economie di vuê, dulà che il disvilup di un paîs al partìs propit de capacitât de sô rêt portuâl.
O vin simpri pensât che la ferovie Pontebane e fos la strade naturâl de nestre economie. Just, ma se cheste linie viers il nestri marcjât di riferiment storic, il centri Europe, no pues contâ ancje su une vie maritime, o vin la ciertece di restâ çuets.
O vin dite che Sant Zorç al podeve jessi l’ideâl, par vie de sô posizion gjeografiche e pal canâl di colegament al mâr, par meti in vore chest imprest, ma te realtât pal so disvilup a son stadis dome cjacaris. Ultime, e rive la gnove che, viodût che no si fasin i lavôrs di dragaç, la destinazion dai containers e larà viers Monfalcon.
E je come une matrioske russe: Monfalcon parsore di Sant Zorç, Triest su Monfalcon. Cheste e je le vision regjonâl unitarie. O disarès univoche, viodût che dutis lis stradis a menin al cjâf lûc julian.
Visìnsi simpri che si trate di une realtât assistude che no je rivade a metisi dacuardi cun Koper, une mangjadorie pai politic triestins, e no dome: une realtât restade su la cjarte e che in tancj agns no è mai svolade in alt.
Ce fâ par salvâle? Facil. Cjatâ chei beâts di furlans che i fasin cinture di salvament. Cemût? Disint che si scuen fâ sinergjie fra il teritori produtîf furlan e il puart di Triest.
A àn cjatât ancje il non di cheste operazion: Il puart – Regjon, dulà che noaltris o produsìn e lôr a tetin.
Ma se no rivin a metisi dacuardi nancje su lis nominis de autoritât portuâl, se cence i bêçs di Rome no rivin a movi un dêt, parcè si varessial di fidâsi di lôr?
Miôr che si tegnin dome le Barcolane, che al puart o pensìn noaltris. ❚
✒ L’om di Buri

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +