Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di pandi.
Il premi al è inmaneât de Associazion Sportive Furlane e noaltris de “Patrie dal Friûl” o vin aderît a colp a cheste iniziative (poiade ancje di Arlef, Aclif, Filologjiche, Istitût Ladin Furlan, Comun di Udin Onde Furlane e La Vôs dai Furlans) che e stice a jessi braurôs de nestre identitât traviers dal sport, un veicul di comunicazion e di cressite pai fantats che in tantis regjon che a pandin lenghis minoritaris al è fondamentâl pe trasmission di une mentalitât peade aes lidrîs e al teritori.
A saran consegnâts i premis des sîs categoriis che a concorin
– Societâts
– Gjornaliscj
– Dirigjents
– Atletis paralimpics
– Zovins sportîfs
– Acuile sportive furlane dal 2023
e cundiplui al vignarà dât un ricognossiment ae cariere par BRUNO PIZZUL, grant professionist che al à contât lis impresis dai campions di ogni sport al public di dute Italie ma al è simpri fat un svant dal jessi furlan.
Par ducj chei che a àn gust di cognossi cui che al vignarà premiât, si viodìn joibe di sere in Municipi a Udin