Sfuei Mensîl Furlan Indipendent
Archivi de Patrie

ZÂL PAR FURLAN. 8. Delit in vie del Lavoro

............


Un romanç zâl a pontadis, che lant daûr aes olmis di une sparizion, nus puartarà dentri un mont pôc contât e fûr mode: chel di ogni dì. I cjatarìn operaris e parons, ma ancje puestins e operadôrs sociâi, ducj a fâ i conts cun cheste ere di precarietât esistenziâl dulà che jessi amì di “chel just” al è dispès plui impuartant di savê costruî un mont cuntune clâf a stele, ma dulà che al resist ancjemò cualchidun bon di rinunziâ a dut par fâ slusî un tic di veretât.

cjapitul 8

Daspò trê mês che o lavoravi li, mi jeri rindût cont di cemût che e zirave la dite. Pieri al tratave di persone cui operaris plui vecjos, tant che Vedran, so fradi Šime e Jan il slovac. Ai mulets invezit al deve l’apartament, trê euros e mieç la ore ai rumens, dome trê ai cossovans. A mi, che no jeri bon di nuie, cinc euros. Pieri, riduçant e tocjantmi il comedon, mi veve dite: «Tu sâs, e je mularie… ur va ben cussì. Ma tu, no sta a dîur trop che ti doi, se no a rompin i coions…». Sul moment, mi jeri fidât. O jeri content di lavorâ cun chei forescj, di interessâmi di lôr, di invidâju a cualchi sunade tal centri sociâl, o di judâju cul talian. Ma la realtât e jere une altre: Pieri Renturin al jere un fi di putane fat e finît, e jo o jeri li par fâ il so tirepîts.

O vevi tacade vore cu la fermade invernâl (cuant che lis fabrichis a sierin sot Nadâl), e daspò o jeri lât indenant cun proroghis dal contrat fintremai ae fermade di Avost, cul acuardi che, daspò dôs setemanis di feriis, mi varessin slungjât il contrat a timp indeterminât. Intant de fermade, però, o vevi fat il gno erôr. O vevi fat doi conts sui bêçs ai mulets, pandint trop che o cjapavi jo. Kosim mi veve dite che lôr a vevin l’apartament. Jo ur vevi fat fâ un pâr di moltiplicazions, e ae fin al saltave fûr che par stâ in chel urinâl di apartament, cun dutis lis oris che a fasevin, tra ducj e vot a spindevin dibot trê mil euros e mieç al mês. Par doi, trê dîs a vevin rugnât tra di lôr. Un cossovan, Thomàs, al jere vignût a domandâmi se e jere vere la vôs che e veve tacât a zirâ e, daspò de mê conferme, al veve dit che al jere normâl che jo, furlan, o tiràs plui bêçs dai forescj: ma no i leve jù che i rumens a cjapassin cincuante centesims plui di lôr. Mi jere tocjât tirâi jù doi porcons, par spiegâi che a vevin di barufâ cul paron, no tra di lôr. Tai ultins dîs de fermade al jere stât un clime di cospirazion, ae CAMIN, e finide la fermade, cuasi mi jere displasût di lâ in feriis.

Intant che o jeri a cjase, mi jere rivade la buste paie di Avost, cun dute la licuidazion. Al telefon, la segretarie mi veve dite che purtrop nol jere plui lavôr e che a scugnivin lassâmi a cjase, ma che forsit plui indenant…

O soi ancjemò in spiete.

Trê setemanis daspò, o vevi cjatât Thomàs ator pes ostariis. Al jere ben cjoc, e mi veve contât che ae fin di Avost i cossovans a jerin lâts in trop a fevelâ cun Pieri e, ae fin de barufe, a vevin vût un euro in plui. Dome che ancje i rumens a vevin fat cussì, e alore a cjapavin simpri mieç euro plui di lôr. «Maladets rumens!», al veve dite Thomàs. E, tal so contâ di cjoc, al jere saltât fûr che al jere stât Kosim a disi a Pieri che o jeri stât jo a pandi sui bêçs.

A dut chest o pensavi intant che o jeri sentât tal ufici di Pieri Renturin. Jo no jeri il so tirepîts, e lui lu saveve.

Al leve indenant cu lis sôs vantariis, su cemût che al veve imbussulât un responsabil di repart de Rivellini, sul so ultin putantour in Austrie, suntun asîl che al steve vierzint dongje di Pristina, cu la colaborazion di chei di Nuova Eucarestia. Pieri al è un di chei che al à une teorie su dut: contentâ la femine, fâle francje cuntun alcul test, meti in dret chei paiaçs dal gender. Di fevelâ di Kosim, nol jere mût. Par Pieri al jere stât un colp di mat di un zovin («Ce vûstu? I rumens a son un pôc zingars, no?») e la sô femine e jere une mate che no si rivave a fâle resonâ.

Timp pierdût. Ma mi jere vignude la idee juste par lâ indenant: Fortunât. Al cognosseve Pieri, al cognosseve Kosim. Ma prin di lâ li di lui, o vevi di lâ a cjoli Lucio.

(8, al va indevant)

Igor Londero

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +