«Lui deve proprio stare qui?», mi dîs Marie cjalant il siôr che mi jeri puartât daûr fintremai a cjase sô. Che po, sul contrat di fit al jere il non di Kosim, e no jerin maridâts.
«Sì, lui è con me».
«Lui», che si clamave Lucio, al jere il gno lavôr.
«Mi fa paura. Mi guarda strano».
In efiets, Lucio al jere stramp. Un bocon di cent e dodis chilos metûts sù un pôc mâl dilunc di un metri e novantetrê di altece. Un grum di pêi neris, dapardut, tancj pardabon, de schene fintremai te barbe. E dut un mont interiôr che di chel nissun al saveve dî nuie, e che lui nol contave. Sentât dongje di me, nol cjalave stramp Marie, ma la tace di aghe che e jere daûr a bevi.
Invezit la piçule Mirela, di doi agns, di cuant che o jerin jentrâts si jere plaçade tal braç di sô mari e lu cjalave curiose, ma cence pôre. Par gno cont, e murive de voie di tocjâi il braç, dut pelôs de spale ai dêts.
«Fidati. Non ci ascolta». O cjali l’orloi. A son cinc. O domandi a Marie se o pues jemplâ une butiliute di plastiche che o tiri fûr dal gno sac. Jê mi cjale stranide e mi dîs che e je aghe frescje tal frigorifar. Jo o jevi sù e o voi li dal rubinet, spiegant che e je miôr chê. «Prendo anche questa», o dîs cjolint une taçute di cafè che e jere a disgotâ tal laip. O torni a sentâmi e o jempli la taçute di aghe. Lucio al torne un moment dal so mont e le pare jù intun sôl cluc, come che e fos tequila, sâl e limon. O tiri fûr lis sôs pirulis dal flacon, e jes met in bocje. Dopo o jempli di gnûf la taçute e lui le suie.
Intant che lis dôs feminis lu cjalin dubiosis, jo o domandi ce che o pues fâ par jê.
Marie lu cjale tirâ jù une tierce tace, e smene il cjâf e e tache a contâ.
«Kosim è sparito».
Par fâle curte, une sere Kosim al jere lât a vore, dopo mangjât, disint che al veve un lavôr di finî (tantis voltis al steve là ancje fin une o dôs di gnot). Però, chê volte nol jere plui tornât. Marie si jere voltade dute la gnot tal jet vueit, e a buinore e veve telefonât a vore. Pieri Renturin, il fi dal paron, i veve dit che no lu vevin viodût. Jê si jere disperade, ma Pieri le veve calmade disint che forsit al saveve lui dulà cirîlu. Dôs oris dopo, Pieri si jere presentât culì, a cjase di Kosim. Si jere sentât, juste te cjadree dulà che o jeri jo, e al veve dit che chel can dal osti al doveve jessi scjampât cuntune cravuate che al frecuentave bielzà di un pôc. A Marie, i jere colât il Cjampon su pe schene.
Pieri le veve lassade vaî. I veve dit che a son robis che a tocjin. Jê no podeve crodi, ma e jere sucedude une robe, cualchi setemane prin. Une multe, cjapade di Kosim, une di chês seris che al veve dite di jessi lât a vore. E Kosim i veve dit di no podê contâi nuie, che nol podeve spiegâi, e jê si jere fidade. Ma cumò…
Pieri al veve tirade fûr une buste, cun dentri mil euros. Al someave in disasi. Cjalantsi lis ongulis, al veve tacât a contâ che tai dîs passâts, Kosim i veve domandât di dâi dute la buine jessude.
Lui nol veve olsât di domandâi parcè, e se al ves savût… Ma purtrop, i veve fat l’assegn. Chei bêçs te buste a jerin l’ultin stipendi e alc di plui par no lassâ jê e la frute pe strade. Bêçs in glorie di Diu. Cussì i veve dit.
Par doi dîs, di scuindon de piçule, e veve vaît plui de pissande di Vasinis. Ma po e veve tacât a resonâ. E i conts no tornavin.
Kosim al jere lât vie cence cjoli nancje un peçot de fieste, vistît di vore e cul motorin. E po, Kosim i voleve ben, a jê e ae frute. Di chest e jere sigure. E veve cjolte la machine, e si jere presentade tai uficis de CAMIN cun Mirela sot dal braç.
(2, al va indevant)
Igor Londero
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +