Sfuei Mensîl Furlan Indipendent
Archivi de Patrie

BASTIANCONTRARIE. STORIE FURLANE AL FEMININ. La colpe di Romilde, veretât o leiende?

............

Se o vessin di lâ a sgarfâ la figure archetipiche e origjinarie di une femine golose di cjar umane – che pe sô fam di gjoldi il plasê e met in discussion dut ce che i crôt fasint un ribalton dal mont, sdrumant par tiere patrie, afiets e sintiments, ma ancje la sô mission di principesse e di mari, di nuvice e di citadine – o varessin di lâ a tucâ te puarte di Romilde, almancul come che le piturin lis peraulis di Pauli Diacun, il famôs autôr de Historia Langobardorum. Ma bisugne simpri stâ atents a ce che i oms a scrivin su lis feminis, parcè che par solit la lôr interpretazion e ven falade di une vision sbaliade che e puarte simpri a judicâ, mai a cirî di capî.
Provìn a esplorâ i fats. Cividât e je scjafoiade di un assedi grant e crudêl, chel puartât indevant dal popul dai Avars, che tal 610 a brusin e a savoltin il ream orientâl dai Langobarts, vignint jù de stepe panoniche. Romilde e à sposât Gjisulf, duche e grant vuerîr. Come che nus contin, sburtade e stiçade di un morbin uterin che le mangje di dentri, si lasse inmagâ tant che une love de bielece dal cuarp dal princip dai mongui, chel Kahn che – discrotât di ogni vistît – al fâs esibizion di se devant des muracis de citât: lui zovin e biel, muscolôs e fuart, salvadi e pericolôs, jê invelegnade di une lussurie che le bruse, smicjantlu dal alt, cjapade di une voie furiose e mate par lui. Seont Pauli, la principesse e je dome che un cuarp fat di gnerfs e di pulsions, involuçade di un istint bestiâl che i cope il lum de reson. Femine: cjar rude cence anime e cence cerviel, come che par solit la tradizion misogjine dai paris de Glesie e tindeve a figurâ la gjernazie diaboliche di Eve.
La storie le cognossìn ducj. Romilde e promet al barbar invasôr di vierzi lis puartis di Cividât in cambi dal so amôr: i sarès bastade une gnot di passion delirante cun chel vuerîr par tradî la memorie dal om (Gjisulf al jere muart in bataie propit combatint cuintri dai Avars), l’amôr pai siei fîs, il sens di apartignince ae sô int e la braùre di jessi sul tron de prime citât langobarde, sielte adiriture di Alboin tant che sede dal so ducât. E cussì, di scuindon e lasse jentrâ chel lôf fin dentri dal sierai dai agnei. E il lôr re ce fasial? Le contente. Dopo vêle “doprade” cun violence par une gnot, le lasse intes mans di dodis vuerîrs che le consumin gnot par gnot intune violence che e pâr no vê fin. Ma invezit, magari cussì no par jê, nol baste: sfinide, batude, violade, Romilde e sarà impirade suntun pâl plantât tal mieç de place. Une punizion esemplâr, compagne e contrarie de sô sielte imorâl. Une muart crudêl e lente, sbeleade dal princip de stepe che al dîs di fâ chest dome par contentâle. Volevie vê un om? Chel pâl di len al rivarà a dâi chê sodisfazion che e cirive.
Un studi plui atent e coragjôs puartât indevant di une grande studiose furlane (une femine, po) Marie Tore Barbina, che tant nus mancje, muarte masse adore, tal plen de sô produzion inteletuâl, al met in evidence une altre visuâl de storie. Romilde, in efiets, si sarès vodade ae richieste dal Khan scambiant il so cuarp pe salvece dal Ream, dai siei fîs, de popolazion langobarde di Cividât. Sfrente inte smuarse di une culture mascje e violente, si sarès duncje imolade, sacrificade par ufrî il so cuarp tant che une monede di scambi, dolorose e tibiade, a pro de libertât e de salvece dal so popul. Lant però incuintri al faliment trement.
Ve chi lis peraulis che Pauli Diacun al dopre intal passaç famôs de so Historia, piturant dut cul colôr di une visuâl dome maschîl: “La femine di Gjisulf, che si clamave Romilde, insiemi cui Langobarts che a jerin scjampâts e lis feminis e i fîs di chei che a jerin muarts in vuere, si jere sierade dentri des muracis di Cividât. I Langobarts a vevin cirût di difindisi ancje in altris fuartecis li dongje, ven a stâi Cormons, Nimis, Osôf, Dartigne, Reunie (Ruvigne), Glemone e ancje Divilin”. E cussì, intant che il lôr re, il Khan, al zirave armât ator des muracis cui siei vuerîrs a cjaval par cirî di jentrâ, Romilde, che lu cjalave dal alt, lu viodè biel di zoventût. Nancje un dubi duncje par Pauli, om che al judiche cence rivâ a capî: “chê prostitude svergognade e voleve gjoldilu cu la sô cjar. Cussì, i fasè savê che se lui le ves cjolte come la sô femine, je lu varès fat jentrâ”. Par chest, daûr des peraulis di Pauli Diacun: “e murì chê traditore crudêl de Patrie che e pensave plui al so gjoldi che a protezi i siei fîs e siei citadins”. Di no crodi, vere?  ❚
Agnul Floramo

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +